Nagprotesta atubangan sa US Embassy sa Pasay City ang lain-laing grupo sa pagpanguna sa Bagong Alyansang Makabayan (Bayan) niadtong Setyembre 16 aron kundenahon ang nagkagrabeng presensya karon sa mga tropang Amerikano, mga armas iggugubat, war games ug base militar sa US sa teritoryo sa Pilipinas. Giatol usab ang protesta sa ika-34 nga anibersaryo sa makasaysayanong pagpalayas sa mga base militar sa US sa Pilipinas.

Niadtong Setyembre 16, 1991, kapin 170,000 patriyotikong mga Pilipino ang nagtapok atubangan sa Senado, aron ipanawagan ang pagbasura sa pagpalugway sa RP-US Military Bases Agreement. Matud sa Bayan, nag-atubang karon ang nasud sa makuyaw nga pagbali sa maong kadaugan. Sa misunod nga mga tuig ug rehimen, gipatuman ang lain-laing kasabutan ug ligal nga basihan sa subling pagsulod sa tropang militar sa US sa Pilipinas. Lakip dinhi ang Visiting Forces Agreement ug Enhanced Defense Cooperation Agreement nga nahimong dalan alang sa pagbalik sa mga base militar sa US sa nasud.