Narunapulo kayukot nga kabatan-unan ngan katawhan an nagrabunos ha kakalsadahan ha naglabay nga duha kasemana agud hiluagan nga kundenaron an wala-tuo nga korapsyon ha ilarum han rehimen Marcos. Iginpanawagan nira an pagpapabaton ngan pagpapapriso ha ngatanan nga mga dabi ha anomaliya labina ha mga proyekto nga flood control.

Nagin landaw an paggios han narunapulo kayukot ha Luneta Park ha Manila yana nga Septyembre 21 ha pangunguna han mga grupo han kabatan-unan, alyansa nga TAMA NA (Taumbayan Ayaw sa Magnanakaw at Abusado Network Alliance), ngan han Bagong Alyansang Makabayan. Ginbaha han mga tawo an Luneta agud ig-insister nga “TAMA NA! Paundangon an pangurakot! Ngatanan nga dabi, kinahanglan papagbatunon!”

Tinambong ha protesta an mga trabahador, parag-uma, kablas ha syudad, tawo ha singbahan, kababayin-an, magturutdo, propesyunal ngan iba pa nga sektor.

Grupo-grupo nga tinambong an mga siklista, rapper, rider, drag queen ngan iba pa nga grupo nga syahan nga matambong ha usa nga protesta. Nagyakan ha programa an mga tinaglawas han progresibo nga partido, lider-masa, padi, ngan mga biktima han baha ngan kalamidad.

“Ginpapamatud-an [han mga nabubuksas nga anomaliya] an hampak han burukrata kapitalismo diin gin-gagamit han mga pulitiko an ira pusisyon ngan impluwensya… agud padakuon an ira karikuhan ngan poder,” pahayag han Bagong Alyansang Makabayan.

Igintutdo nira hi Ferdinand Marcos Jr komo prinsipal nga may baratunon ha makarimadima nga korapsyon ha mga proyekto nga flood control. Ginsukna han grupo an switik nga pagdiwara ni Marcos ha korapsyon bisan kun hiya an nagproponer, nagpirma ngan nagpatuman ha nasyunal nga badyet. Mapakadto an Bayan ha Mendiola agud sukton hi Marcos.

Kadungan hini, kinahanglan liwat kuno papagbatunon hi Sara Duterte ngan Rodrigo Duterte ha pagmalgastar ha confidential and intelligence funds, ha Pharmally scam, ngan iba pa nga korapsyon. Kaparte hira han sistematiko nga korapsyon ha nasud.

Labot ha Luneta ngan Mendiola, iginhimo liwat an paggios ha EDSA People Power Monument ha Metro Manila.

Ha iba pa nga parte han nasud, iginhimo an mga demonstrasyon ngan aktibidad ha Ilocos Norte, La Union, Pangasinan, Benguet, Cagayan, Isabela, Pampanga, Bulacan, Oriental at Occidental Mindoro, Camarines Sur, Catanduanes, Albay, Sorsogon, Negros Occidental ngan Oriental, Iloilo, Capiz, Antique, Aklan, Bohol, Cebu, Eastern Samar, Leyte, Misamis Oriental, Davao del Sur, ngan South Cotabato.

Hiluag nga kagiusan protesta

Antes an pagduruyog ha Luneta ngan EDSA, nagin landaw na an hiluag nga partisipasyon han mga kabatan-unan ngan iba pa nga demokratiko nga sektor agud atuhan an korapsyon. Magkalain-lain nga mahimuon nga porma han protesta an iginhimo ha bug-os nga Pilipinas.

Kaupod hini nga mga paggios an mga walkout ngan boykot ha klase ha naglabay nga semana han masobra 16,000 nga mga estudyante, magturutdo ngan empleyado ha University of the Philippines ha Los Baños (7,000), Diliman (5,000), Baguio (1,800), Cebu (1,000), Manila (600), Mindanao (600), Pampanga (200), Visayas (200), ngan Tacloban (120). Naghimo liwat hin mga piket ngan demonstrasyon ha masobra 40 nga mga pampubliko ngan pribado nga unibersidad, kaupod an pinakadagko ha nasud ha Ateneo de Manila University (2,000), Saint Louis University (1,000), Cavite State University (400), Bulacan State University, Tarlac State University, Bicol University, Mindoro State Unversity, Visayas State University, Mindanao State University-GenSan, Xavier University ngan mga eskoylahan ilarum han One Taft Alliance.

Haros kada adlaw an piket han mga nasyunal ngan lokal nga grupo ha Metro Manila kalakip an ha Quezon City, Manila, Navotas City, Caloocan City, Muntinlupa City, Taguig City ngan Marikina City. Ha bug-os nga mga bungto, sugad ha Hagonoy, Bulacan, humugos an mga residente ha kakalsadahan agud kundenahon an palpak nga pagresolba ha baha nga haros bug-os nga tuig na nga waray paghuhubas. Ginios liwat an 6,000 nga residente han Pampanga kontra korapsyon. Naglansar liwat han pira kaadlaw nga ukoy-pasada an mga grupo ha transportasyon. Gintagan liwat porma an sobra nga kangalas han katawhan ha pagprotesta ngan paglabog han lagay ngan pintura ha mga upisina han ahensya han gubyerno ngan kontratista nga dabi ha korapsyon.

Ha diri mamenos ha 16 nga unyon ilarum han Kilusang Mayo Uno, naglansar hin protesta kada panginudto ngan pag-uli an mga unyon ha Nexperia Phils, PUP Janitors, Philfoods Fresh-Baked Products, Pambato Cargo Forwarders, Daiwa Seiko Philippines Corp ngan damo nga iba pa. Guliat nira: Marcos, kumander-in-thief papagbatunon! Wala-tuo liwat an pagprotesta ngan pagbabagting han mga lingganay han singbahan, duruyog nga pangadi, pagtatayok han kandila, pagsasab-ong ngan pagpipilit hin mga balatengga ngan poster, paghimo han mga kanta ngan rap, sayaw-protesta ngan zumba, fun run ngan iba pa nga porma han paggios.

Nagporma liwat an pagkundena ha anomaliya ha tigda nga pagbug-os ha magkalain-lain nga balitang han mga sumpayan, alyansa ngan asosasyon. Klaro an mensahe han kagiusan protesta: panunukot ngan baratunon.