Walay hunong ang pagsabwag og kabangis sa armadong mga pwersa sa estado sa katawhang nagabarog alang sa ilang mga katungod.

Pagpanganyon. Sa lalum nga kagabin-on niadtong Setyembre 9 hangtud buntag sa Setyembre 10, nagpabuto ug nanganyon ang 203rd IBde sa Sityo Tugas ug kasibit nga mga komunidad sa Barangay San Vicente, Roxas, Oriental Mindoro. Gitarget sa pagpangistraping ug pagpanganyon dili lamang ang lasang apan bisan ang mga umahan, komunidad sa mga Mangyan, ug mga lugar nga gidudahan nilang giatrasan sa hukbong bayan nga ilang nakasangka.

Bunga niini, pugos nga mibakwit ang gatusan ka Mangyan lakip ang mga bata, kababayen-an, ug mga tigulang nga taga-Sityo Tugas ug Sityo Swerte sa Barangay San Vicente ug mga kasikbit pang kabalayan.

Pag-aresto. Niadtong Setyembre 16, giaresto sa mga pulis ang upat ka residente sa Catmon, Malabon City sa mga kasong perjury ug grave coercion, samtang usa pa ka nalambigit sa kaso ang misurender. Ang mga gipriso myembro sa Sandigan Nagkakaisang Mamamayan sa Upper Catmon nga nagababag sa planong demolisyon ug pagpangilog sa yuta sa barangay.

Pagpamig-ot. Sa miaging mga semana, gisubaybayan ug gipatawag sa mga pulis ang pito ka myembro sa Amihan-Cagayan aron ipailalum sa interogasyon ug pugsong moluwat sa ilang organisasyon. Lakip kanila ang lider-kababayen-an nga si Emilia Ventula.

Sa Negros Occidental, nataho ang pugos nga pagsulod sa mga pwersa sa estado sa balay ug gihulga ang duha ka mag-uuma sa Barangay Macagahay, Moises Padilla ug Barangay Marcelo, Calatrava. Ingon niini usab ang gihimo sa balay sa mga residente sa Barangay Linantuyan ug Barangay Trinidad sa Guihulngan City. Giadtuan sila sa tungang gabii, gipailalum sa interogasyon ug gitiunan og pusil.

Sa Panay, giakusahan sa 3rd IB ang lider sa Paghugpong sang mga Mangunguma sa Panay kag Guimaras (PAMANGGAS) nga si Lucia Capaducio isip usa ka rebelde nga “at large” (may kaso ug wala pa nadakpan) tungod sa pagkamartir sa iyang anak nga Pulang manggugubat.