Manindigan Network, gitukod. Nagtapok ang mga lider-relihiyoso, tawong-simbahan, mga grupo sa tawhanong katungod ug uban pa aron tukuron ang Manindigan Network usa ka kahugpungan nga mobatok sa mga paglapas sa tawhanong katungod ug internasyunal na makitawhanong balaod ilalum sa rehimeng Marcos niadtong Setyembre 6 sa Shalom Center sa Maynila. Niadtong Setyembre 12, gitukod usab ang Manindigan-Central Luzon sa Saint Scholastica’s Academy sa San Fernando, Pampanga, ang kinaunhang rehiyonal nga balangay niini.

Pakigbisog sa mga delivery rider sa Cebu. Midagsang ang mga Maxim delivery rider ug myembro sa Piston Cebu sa LTO Central Visayas Office niadtong Setyembre 15 aron ipanawagan ang pag-release sa ilang mga lisensya ug motorsiklo nga gikumpiska sa mga awtoridad. Gikundena nila ang pagpami-ot ug dili makatarungang aksyon sa ahensya sa mga rider sa Maxim.

Okupasyon sa mga Israeli sa Siargao, gikundena. Naglunsad og protesta ang mokabat sa 80 ka residente sa Siargao sa Sunset Bridge sa Catangnan niadtong Setyembre 14 aron kundenahon ang gakahitabong henosidyo sa Gaza, ang inanay nga pagpanakop sa mga Israeli sa ilang isla ug ang planong pagtukod dinhi og Chabad House. Naglunsad usab og petition signing batok sa pagtukod og Chabad House nga nakatigum na og 3,550 ka pirma sa kasamtangan.

Korapsyon sa budget alang sa 2026, gibabagan. Nagprotesta niadtong Setyembre 10 atubangan sa Senado ang mga nasudnon demokratikong organisasyon, aron kundenahon ang pagratsada sa budget sa Office of the President sa kongreso gamit ang takuban nga “parliamentary courtesy.” Matud sa mga grupo, puno sa korapsyon ang budget alang sa 2026. Gipatas-an ang budget alang sa modernisasyon sa AFP, confidential and intelligence funds ug NTF-Elcac, samtang gikibhangan ang budget alang sa serbisyo sa panglawas ug halos walay pagsaa alang sa budget sa edukasyon.