Taliwala sa mas gipagrabe ug makanunayong mga operasyong militar sa Armed Forces of the Philippines (AFP) sa kabanikanhan, nakapahigayon ang Bagong Hukbong Bayan (BHB) og mga armadong aksyon ug aktibong depensa sa Negros, Quezon, ug Mindoro.

Sa Negros Occidental, gipabuthan sa BHB-Northern Negros (Roselyn Jean Pelle Command) ang nag-operasyong tropa sa 79th IB sa Purok 5, Barangay XI (Gawahon), Victorias City niadtong Setyembre 14 sa gabii. Nasamdan ang pipila ka sundalo nga nagsilbing protektor sa agalong yutaan nga gapangilog og yuta.

Sa Quezon, subling gipabuthan sa BHB-Quezon (Apolonio Mendoza Command) niadtong Setyembre 4 sa gabii ang bag-ong tukod nga kampo militar sa 85th IB sa Barangay Cogorin Ibaba, Lopez. Ikaduha na nga giatake sa BHB ang kampo nga gikalipay sa mga residente.

Sa taho bag-o lang sa BHB-Southwest Negros (Armando Sumayang Jr Command), gipabuthan niini ang nagkampong tropa sa 15th IB sa Sityo Patol, Barangay Caliling, Cauayan, Negros Occidental niadtong unang semana sa Agosto.

Aktibong depensa. Nakalunsad og kontra-atake ang BHB-Mindoro (Lucio de Guzman Command) batok sa nagaatakeng tropa sa 1st IB sa Sityo Tugas, Barangay San Vicente, Roxas, Oriental Mindoro niadtong Setyembre 9. Matud sa yunit, dihadiha niining nabantayan ang presensya sa pwersa sa 1st IB maong dali nga nakapangandam, nakapusisyon ug nakapabuto ang mga Pulang manggugubat.

Napatay sa panagsangka ang usa ka sundalo ug duha ang nasamdan. Giparangalan usab sa BHB-Mindoro si Ka Kardo, 33, Pulang manggugubat nga namartir samtang maisugong nakigsangka sa mga pasista.