Lubos nga nadismaya ang mga biktima kag ila mga abogado kag tagasuporta sa pagpaiway sang Pre-Trial Chamber sang International Criminal Court (ICC) sa naka-iskedyul nga kumpirmasyon sang kaso nga krimen batuk sa katawhan ni Rodrigo Duterte sa Septyembre 23. Gin-apinan sang korte ang pahayag sang mga abogado nga “wala sa tindog” ukon indi “maayo ang panglawason agud mabista” si Duterte. Suno sa prosekusyon sang iCC, mismo ang mga anak ni Duterte ang nagahambal nga yara sa husto nga panghuna-huna ang ila amay.

Halin sa ginpaidalum sa kustodiya sang ICC si Duterte, aktibo nga nagamaniobra ang iya mga abogado para padugayon kag tubtob sa ulihi mapabasura ang kaso batuk sa iya. Sunod-sunod ang mga petisyon nga ginpasaka nila agud likawan ang kumpirmasyon sang asunto.

Mabaskog nga ginpamatukan sang mga biktima ang mga padihot nga ini. Panawagan nila, ipadayon ang pagbista sa pinakatemprano nga panahon.