Sining nagligad nga mga binulan, nahayag ang makasiligni nga mga kaso sang human trafficking sang mga Pilipino nga ginpasulod sa mga “scam hub” sa mga pungsod sang Cambodia, Thailand, Laos kag Myanmar. Suno sa datos sang estado, indi magnubo sa 695 ka Pilipino nga biktima ang nakaluwas subong nga tuig sa amo nga mga pungsod.

Ang scam hub trafficking isa ka tipo sang trafficking ukon iligal nga rekrutment para sa paghimulos, kon diin ang mga biktima ginatiplang sang tanyag nga peke nga trabaho kag ginapasulod sa mga scam hub ukon scam farm bilang online scammer para sa mga sindikato. Bisan indi tanan nga biktima na-traffick, tanan nga mamumugon sa scam hub ginagamitan sang kapintas kag pagpang-abuso agud piliton ang mga ini nga himuon ang iligal nga aktibidad.

Ang masami nga ginapahimo sa mga biktima amo ang “romance scam” kon diin ginapaluyag nila ang mga target nga biktima, nga sa ulihi gina-engganyo nga magpadala sang kwarta para sa peke nga negosyo, cryptocurrency kag iban pa nga peke nga pangapital. Target sang ila operasyon ang mga tawo sa mga pungsod sa Asia, North kag South America, kag Middle East. Ang mga scam hub ginadumalahan sang mga dumuluong nga sindikato nga kriminal, kakunsabo ang mga lokal nga opisyal sang gobyerno.

Una nga nareport ang amo nga dagway sang trafficking sadtong 2015. Apang nagsugod ini nga mangin lapnagon kag sistematiko sadtong 2021. Ginagamit sang mga sindikato ang mga abandonado nga kasino kag hotel para himuon nga scam hub. Mayoriya sang mga scam hub nagsugod sa Southeast Asia apang naglapad ini tubtob sa West Africa, Middle East kag Central America. Target sang mga sindikato ang mga mamumugon nga may ihibalo sa information technology kag maayo sa lenggwahe nga English.

Nangin lunsaran man sang scam hub ang Pilipinas, nga nagapanago sa likod sang mga Philippine Offshore Gaming Operation ukon POGO nga gintukod sa pungsod. Madamo sa mga gina-ulipon diri mga Chinese nga iligal nga ginapasulod sa pungsod kag mga Pilipino nga ginapatrabaho bilang scammer sa mga pasilidad nga ini.

Ang makahadlok nga inagihan sang mga biktima

Mayoriya sa mga Pilipino nga biktima naganyat nga magtrabaho bilang customer service representative sa Cambodia kag Myanmar nga may sweldo nga US $700 kada bulan. Apang pag-abot nila didto ginakumpiskar ang ila pasaporte kag selpon. Ginapasulod sila sa scam hub, nga ang target mga Pilipino sa US.

Ulipon kag baligya ang trato sa mga Pilipino nga migrante. Kon indi nila mahimo ang ila trabaho ukon maabot ang kota, ginasakit sila, ginapriso nga wala sang pagkaon kag ginapakahuy-an sang ila mga amo. Pinakalala nila nga naagihan ang tortyur kag pagkuryente. Ang iban nga mamumugon ginabaligya sa iban nga kumpaniya oras nga indi na sila “mapuslan” sang ila amo.

Bisan nakaluwas sa mga scam hub, madamo sa mga biktima nga Pilipino padayon nga nagabatyag sang grabe nga troma kag problema sa ikaayong lawas tungod sa makahaladlok nila nga inagihan.

Sa subong, may 148 ka Pilipino nga migrante ang natalana nga luwason kag ipauli sa Pilipinas halin sa lain-lain nga scam hub sa Asia.

Ang malala, imbes nga hatagan sang pangmalawigon nga trabaho nga may makabuhi nga sweldo, ang Department of Migrant Workers pa mismo ang nagapostura nga “trafficker” sang estado. Ginalibod sini ang barato nga kusog pangabudlay sang mga Pilipino sa iban nga pungsod kabaylo sang binilyon nga dolyar nga remitans samtang ginaseparar ang mga pamilya kag ginakuhaan sang dignidad ang mga migrante. Luyag pa sini subong nga gamiton ang mga lokal nga gobyerno bilang “rekruter” sang mga pungsod kag dumuluong nga kumpaniya, sa pihak sang indi maubos nga estorya sang paghimulos kag abuso nga gin-agihan sang mga migranteng Pilipino.

Tubtob indi maresolbar ang kaimolon kag mabasura ang labor export program nga nakatuga sang mga pwersahan nga migrasyon, pat-od nga magdamo pa ang mga biktima nga pintasan kag abusohan sang mga sindikato, kag himuslan ang desperasyon sang mga migrante, nga wala sang iban nga gusto kundi mahatagan sang masulhay nga kabuhi ang ila pamilya.