Padayon ang paghuganas sang mga protesta sa bug-os nga pungsod batuk sa sistema sang korapsyon sang estado. Ginalaragway sini ang nagalumapaw nga kaakig sang malapad nga masa sang pumuluyong Pilipino batuk sa higante nga burukrata-kapitalista nga pagpangkurakot sang rehimen Marcos.

Sa desperasyon nga tabunan ang kaugalingon sa kaakig sang pumuluyo, pilit nga nagapaguwapo si Marcos agud baliskaron ang malawig na niya nga reputasyon nga pasimuno sang korapsyon. Samtang gina-ipit ang karibal nga pulitiko kag bisan mga alyado nga wala nagasentro sang kikbak, pilit nga ginatabunan ni Marcos ang kaugalingon nga papel sa lapnagon nga korapsyon.

Gintukod ni Marcos ang wala sang pulos nga “independyente nga komisyon” nga kuno maga-imbestigar sang maanomaliya nga proyektong flood control. Taktika lang ang imbestigasyon nga ini nga ginmando ni Marcos Jr agud palibugon ang pumuluyo kag ipalayo sa iya ang atensyon.

Matuod nga si Marcos ang utok sang korapsyon sa likod sang maanomaliya nga proyekto sa flood control, nga ginbubuan niya sang masobra ₱1 trilyon halin sang magpungko sa poder sadtong 2022. Kaangay sang tanan nga iya ginsundan, si Marcos nagakamal sang binilyon ka piso halin sa kikbak sa multibilyon nga mga kontrata sang gobyerno, lakip ang mga karsada, taytay, riles, kag iban pa nga mga dalagko nga proyekto sa konstruksyon, pati man ang ismagling, kontrata sa depensa, kontrata sa pagpa-arkila sang duta, kag tuman ka damo nga pamaagi sa pagkawkaw sa kwarta sang pumuluyo.

Nagapasulhay sa kabuhi kag nagalangoy sa manggad ang lider sang burukrata-kapitalista nga si Marcos. Bantog ang pagkahilig niya sa multimilyon ka piso nga eksklusibo nga konsyerto kag magarbo nga handaan kasubong sang ginhimo niya san-o lang sa iya kaadlawan. Grabe ang pagbatikos sa iya sang paglupad niya sa Singapore para lang maglantaw sang karera sang mga awto. Gingamit niya kag sang iya asawa ang pondo sang pumuluyo para himuon personal nga bakasyunan ang Malacañang, para sa kapritso sang ila pamilya.

Barahubal nga butigon si Marcos nga nagapostura nga nagapakig-isa sa pumuluyo sa pagkangil-ad sa korapsyon, kag sang paghambal nga kon indi siya presidente maupod man siya sa mga protesta. Ang matuod, gina-uyatan ni Marcos ang mapamigos nga gahum sang pasistang estado nga ginagamit niya agud pahipuson ang pumuluyo kag sumpuon ang tanan nga dagway sang pakig-away sang pumuluyo.

Buhi ang ginpapanubli sang 14-tuig nga pasistang diktadurya kag pag-ubos sa kaban sang pumuluyo sang iya amay nga si Marcos Sr. Ang mga organisador kag katapo sang mga unyon sang mamumugon, mga asosasyon sang komunidad, mga organisasyon sang estudyante, ginagamo kag target sang mapintas nga pagpang-atake sang mga ahente sang estado. Ginatos pa gihapon ka bilanggong pulitikal ang nabilanggo. Patarasak ang mga paglapas sa tawhanon nga kinamatarung kag internasyunal nga makatawo nga layi sa pagpatuman ni Marcos sang layi militar sa linibo ka barangay sa kaumhan agud sumpuon ang pagpangapin sang pumuluyo sang ila kadutaan kag palangabuhian batuk sa pagsulod ukon pagpalapad sang mga plantasyon kag operasyon mina.

Si Marcos, lider sang bururata-kapitalistang estado, ang hari sang korapsyon. Siya ang lider sang pasista nga may kamot nga salsalon agud dugmukon ang tanan nga nagapamatuk kag nagapakig-away. Siya ang lider sang “Tuta sang Kano” kag suluguon nga nagaserbe sa estratehikong mga interes sang imperyalistang US sa ekonomiya, pinansya, kag militar.

Biktima ang mga Pilipino sang lapnagon kag yara sa sistema nga korapsyon kag pasismo. Nagaantus sila sa nagakadunot nga sosyal nga serbisyo, pagsaka sang mga galastuhan sa pangabuhi, manubo nga sweldo, lapnagon nga kawad-on sang trabaho, kawad-on sang palangabuhian, kag pangkabug-osan nga paglala sang kahimtangan sosyo-ekonomiko. Nagabangon kag nagaprotesta sila agud kasuhan si Marcos kag pasabton ang mga korap.

Kinahanglan palig-unon sang mga Pilipino ang ila paghiliusa, tukuron ang ila mga organisasyon, kag palaparon kag pasingkion ang ila mga protesta sa maabot nga mga binulan. Dapat nila nga ibuyagyag kag sikwayon ang pila ka pwersa nga nagasakay sa protesta nga kontra-korapsyon nga naga-proteksyon kay Marcos kabaylo sang benepisyo kag pusisyon. Nagaserbe sila sa mga padihot ni Marcos nga pakalmahon ang protesta. Apang napaslawan sila tungod ang mga wala sang unod kag wala pulos nga pakitang-tao ni Marcos mas nagagatong sa kahublagan protesta. Nagabaskog ang singgit para sa paghalin ukon pagpalayas kay Marcos kag tanan nga korap sa estado.

Samtang ginapalapad, ang mga protesta batuk kay Marcos kag sa lapnagon nga korapsyon dapat ipasaka kag iangot sang pumuluyong Pilipino sa pangkabug-osan nga paghimakas agud tapuson ang mapamigos kag mapanghimulos nga sistemang mala-kolonyal kag mala-pyudal. Ang sistema nga ini yara sa idalum sang makasahi nga pagpamuno sang mga dalagko nga burgesya kumprador, mga burukrata kapitalista, kag mga dalagko nga agalon mayduta.

Ang mga sahi nga ini sa Pilipinas ginbun-ag sang imperyalistang US kag naga-kontrol sa neokolonyal nga estado. Tanan sila nagapaidalum, nagasunod-sunod kag nagapakigkunsabo sa imperyalistang US sa pagkawkaw sa manggad sang pungsod kag sa pasistang pagsumpo sa malapad nga masa sang pumuluyo. Sa partikular, gamit sang mga burukrata kapitalista ang gahum sang estado agud kawaton ang kwarta sang pumuluyo kag magpamanggad sa tanan nga dagway sang korapsyon.

Sa katapusan nga resulta, ang paghimakas batuk sa korapsyon kag tanan nga dagway sang pagpamigos sa pumuluyong Pilipino masobra pa sa pagkakas kay Marcos ukon bisan pa sa pagpalayas sa bug-os nga gobyerno. Magabot lang ang gamot sang sistematikong korapsyon paagi sa demokratikong rebolusyon sang banwa agud tapuson ang tatlo ka sarot nga burukrata-kapitalismo, imperyalismo kag pyudalismo. Ginasulong ini sang Partido Komunista sang Pilipinas kaupod ang Bagong Hukbong Bayan bilang nagapanguna nga hinganiban agud tapuson ang armadong kusog sang reaksyonaryo kag neokolonyal nga estado.

Gina-engganyo sang Partido ang pumuluyong Pilipino nga labi pa nga pabaskugon ang ila mga rebolusyonaryong organisasyon, palaparon ang kubay sang National Democratic Front, kag suportahan ang, kag magpatapo sa, Bagong Hukbong Bayan.

Nagapanawagan ang Partido sa pamatan-on nga magkadto sa malapad nga kaumhan kon diin padayon nga ginapanday sang rebolusyonaryong kahublagan ang mga organo sang gahum pangpulitika. Ginapundar ini base sa mga rebolusyonaryong organisasyon masa sang mangunguma, pamatan-on, kababaehan kag iban pa nga demokratikong sektor, kabulig ang hukbong bayan. Nagaserbe ini nga binhi sang demokratikong gobyerno sang pumuluyo nga magabulos sa dunot kag papet nga gobyerno nga malab-ot sa kadalag-an sang armadong paghimakas para sa pungsodnon nga kahilwayan kag hustisyal sosyal.