Gindumdom sang rebolusyonaryong pwersa sadtong Septyembre 11 ang una nga anibersaryo sang pagkamartir sang mga kaupod nga sanday Ariel Arbitrario (Ka Karl), Erin Sagsagat (Ka Jorly), kag Danielle Marie Pelagio (Ka Seed), ang ginatawag nga Peñablanca 3. Ang tatlo lunsay mga hors de combat nga makangilidlis nga ginpamatay sang berdugo nga 502nd IB sa Barangay Baliuag, Peñablanca, Cagayan.

Bilang paghanduraw sa ila maduagon nga kabuhi, kag indi mapakanubo nga pagka-bagani kag amot sa pungsodnon-demokratikong rebolusyon, naglunsar sang pasidungog ang rebolusyonaryong mga pwersa sa Cagayan Valley nga may tema “Pasilakon ang bulawanon nga pagka-baganihan sang aton mga martir! Manadlong kag ipadayon ang gina-usoy nila nga banas sang rebolusyon!”

Pinakataas nga pagsaludo ang ginhalad sa tatlo kag ginhanduraw ang ila kabuhi kag paghimakas bilang hangaway sang pumuluyo. Naghalad sang mga binalaybay kag ambahanon ang lain-lain nga mga grupo kag indibidwal sa pasidungog. Pila sa mga palagwaon amo ang mga binalaybay nga Binhi ng Paglaya (Binhi sang Kahilwayan) ni Amanda Echanis, Tagubilin at Habilin (Panugon-tugon kag Ginbilin) ni Jose Lacaba kag Hukbo ng Maralita (Hukbo sang Imol) ni Kerima Tariman. Naghimo man sang video tribute ang BHB-Cagayan Valley nga may ginahambal nga binalaybay nga Silang Walang Kamatayan (Sila nga Wala sang Kamatayon) ni Emil Magalat. Natapos ang programa sa pagkanta sang Mangahas kag sang Awit ng Pag-asa. Matuod nga inspirasyon ang ila pagkapinasahi kag ang ila indi magtaliwan nga pagkadungganon!