Nareport sang nagligad nga mga semana ang pila ka naagum nga kadalag-an kag nagapadayon nga pakigbato sang mga residente sa mga makawasak nga pagmina kag dredging sa Ilocos Sur, Kalinga, Nueva Vizcaya, Mindoro kag Sorsogon.

Sa Ilocos Sur, naduso sang ululupod nga paghulag sang pumuluyo ang lokal nga gobyerno nga maghambal kag magpahayag sang pagpauntat sa operasyon sang makawasak nga operasyon dredging sang Isla Verde Mining and Development Company sa bukana sang Lower Abra River sa sakop sang probinsya. Sadtong Septyembre 2, nagpahayag ang lokal nga gobyerno nga pauntaton ang operasyon tungod sang ululupod kag wala-untat nga aksyon sang mga komunidad.

Sa Kalinga, napabasura sang mga tumandok ang ginpaguwa nga bogus nga Free, Prior and Informed Consent para sa Saltan Dam nga proyekto sang kumpaniyang Australian nga JBD Water Power Inc. Nahibaluan ini sang mga residente sadtong Septyembre 15 kadungan sang pagpasaka nila sang petisyon sa National Commission for Indigenous Peoples agud ipabasura ang FPIC para sa Saltan Dam kag Upper Tabuk Hydropower Project (UTHP). Ginbalita man sa ila nga ang FPIC para sa UTHP posible man nga bawion kag ibasura.

Sa Nueva Vizcaya, nagbarikada ang mga residente sang Barangay Bitnong, Dupax del Norte sa ila kadutaan halin Septyembre 17 agud punggan ang pagsulod sang mga gamit sa pagmina sang Woggle Corporation, isa ka kumpaniya nga nakabase sa United Kingdom. Tungod sa lapnagon nga pagpamatuk sang pumuluyo sa plano nga ekplorasyon, temporaryo nga gin-untat sang kumpaniya ang ila operasyon.

Sa Oriental Mindoro, ginlunsar ang isa ka prayer rally sadtong Septyembre 6 sa merkado sang banwa sang Gloria agud pamatukan ang dredging sa isla. Nagtambong sa hublag ang lain-lain nga asosasyon, organisasyon, simbahan, mga pulitiko, kag residente halin sa Calapan City tubtob Bansud. Siling nila, tuman nga makaguba sa baybayon kag peligro sa palangabuhian sang mga mangingisda ang dredging.

Sa Sorsogon, napa-suspenso sang mga residente sadtong Septyembre 10 ang permit sang Siating Construction and Development Corporation para sa pag-kwari sang bato kag balas sa Barangay San Roque sa banwa sang Bulusan. Ginbase sang gobernador ang desisyon sa ginpasaka nga position paper sang San Roque Ecological Initiative sang Barangay San Roque. Siling sang mga residente, iligal ang kwari tungod wala sang pangpubliko nga konsultasyon. Malapit man ini sa Bulusan Volcano Natural Park (BVNP), nga isa ka protected area.