Sa tunga sang grabe nga pagpasingki kag tayuyon nga mga operasyon militar sang Armed Forces of the Philippines (AFP) sa kaumhan, nakapatigayon ang Bagong Hukbong Bayan (BHB) sang mga armadong aksyon kag aktibo nga depensa sa Negros, Quezon, kag Mindoro.

Sa Negros Occidental, ginpalukpan sang BHB-Northern Negros (Roselyn Jean Pelle Command) ang naga-operasyon nga tropa sang 79th IB sa Purok 5, Barangay XI (Gawahon), Victorias City sadtong Septyembre 14 sang gab-i. Napilasan ang pila ka soldado, nga nagaserbe nga protektor sang agalon mayduta nga nagapang-agaw sang duta.

Sa Quezon, liwat nga ginpalukpan sang BHB-Quezon (Apolonio Mendoza Command) sadtong Septyembre 4 sang gab-i ang bag-ong tukod nga kampo militar sang 85th IB sa Barangay Cogorin Ibaba, Lopez. Duha ka beses na nga gin-atake sang BHB ang kampo nga ginkalipay sang mga residente.

Sa report sang sini lang sang BHB-Southwest Negros (Armando Sumayang Jr Command), ginpalukpan sini ang nagakampo nga tropa sang 15th IB sa Sityo Patol, Barangay Caliling, Cauayan, Negros Occidental sadtong una nga semana sang Agosto.

Aktibo nga depensa. Nakalunsar sang kontra-atake ang BHB-Mindoro (Lucio de Guzman Command) batuk sa naga-atake nga tropa sang 1st IB sa Sityo Tugas, Barangay San Vicente, Roxas, Oriental Mindoro sadtong Septyembre 9. Suno sa yunit, gilayon sini nga nabantayan ang presensya sang pwersa sang 1st IB amo nga madasig nga nakahanda, nakapusisyon kag nakapalupok ang mga Pulang hangaway.

Napatay sa inaway ang isa ka soldado kag napilasan ang duha ka iban pa. Samtang, ginpasidunggan sang BHB-Mindoro si Ka Kardo, 33, Pulang hangaway nga namartir samtang maisog nga nakig-away sa mga pasista.