Wala-puas ang pagsabwag sang kalakasan sang armadong mga pwersa sang estado sa pumuluyo nga nagatindog para sa ila mga kinamatarung.

Pagpangkanyon. Dis-oras sang gab-i sadtong Septyembre 9 tubtob aga sang Septyembre 10 nagbuhi sang mga bala kag nagpangkanyon ang 203rd IBde sa Sityo Tugas kag katambi nga mga komunidad sa Barangay San Vicente, Roxas, Oriental Mindoro. Gintarget sang pagpang-istraping kag pagpangkanyon indi lang ang kagulangan kundi ang mga talamnan, komunidad sang mga tumandok nga Mangyan, kag mga lugar nga ginasuspetsuhan nila nga gin-atrasan sang hukbo sang banwa nga ila naka-engkwentro.

Tungod sini, napilitan nga maghalin ang ginatos ka tumandok nga Mangyan lakip ang mga bata, kababaehan, kag mga tigulang nga taga-Sityo Tugas kag Sityo Swerte sang Barangay San Vicente kag mga malapit pa nga mga kabalayan.

Pag-aresto. Sadtong Septyembre 16, gin-aresto sang mga pulis ang apat ka residente sang Catmon, Malabon City sa mga kaso nga perjury kag grave coercion, samtang isa ka naapid pa sa kaso ang nagsungka. Ang mga ginbilanggo myembro sang Sandigan Nagkakaisang Mamamayan sa Upper Catmon nga nagapamatuk sa plano nga demolisyon kag pagpang-agaw sang duta sa barangay.

Pagpang-ipit. Sa nagligad nga mga semana, ginpanilagan kag ginpatawag sang mga pulis ang pito ka myembro sang Amihan-Cagayan agud ipaidalum sa interogasyon kag piliton nga maghalin sa ila organisasyon. Lakip sa ila ang lider-kababaehan nga si Emilia Ventula.

Sa Negros Occidental, nalista ang pwersa nga pagsulod sang mga pwersa sang estado sa balay kag ginpahog ang duha ka mangunguma sa Barangay Macagahay, Moises Padilla kag Barangay Marcelo, Calatrava. Amo man ini ang ginhimo sa balay sang mga residente sang Barangay Linantuyan kag Barangay Trinidad sa Guihulngan City. Ginkadtuan sila sang tungang gab-i, ginpaidalum sa interogasyon kag gintayaan sang pusil.

Sa Panay, ginpasibangdan sang 3rd IB ang lider sang Paghugpong sang mga Mangunguma sa Panay kag Guimaras (PAMANGGAS) nga si Lucia Capaducio bilang isa ka rebelde nga “at large” (may kaso kag wala pa nadakop) tungod sa pagkamartir sang iya anak nga Pulang hangaway.