Manindigan Network, gintukod. Ululupod ang mga lider-relihiyoso, tawong simbahan, mga grupo sa tawhanon nga kinamatarung kag iban pa agud tukoron ang Manindigan (Manindugan) Network, isa ka pag-inangtanay nga magpakigbato sa mga paglapas sa tawhanon nga kinamatarung kag internasyunal nga makatawo nga layi sa idalum sang rehimen Marcos, sadtong Septyembre 6 sa Shalom Center sa Manila. Sadtong Septyembre 12, gintukod man ang Manindigan-Central Luzon, sa Saint Scholastica’s Academy sa San Fernando, Pampanga, ang pinakauna nga pangrehiyon nga tsapter sini.

Away sang mga delivery rider sa Cebu. Ginsulong sang Maxim delivery rider kag myembro sang Piston Cebu ang LTO Central Visayas Office sadtong Septyembre 15 agud ipanawagan ang pag-release sang mga lisensya kag motorsiklo nga ginkumpiskar sang mga otoridad. Ginkundenar nila ang pagpang-ipit kag indi rasonable nga aksyon sang ahensya sa mga rider sang Maxim.

Okupasyon sang mga Israeli sa Siargao, ginkundenar. Naglunsar sang protesta ang mga 80 ka residente sang Siargao sa Sunset Bridge sa Catangnan sadtong Septyembre 14 agud kundenaron ang nagakatabo nga henosidyo sa Gaza, amat-amat nga pagpangsakop sang mga Israeli sa ila isla kag ang plano nga pagtukod sang Chabad House diri. Naglunsar man sila sang petition signing batuk sa pagtukod sang Chabad House kag sa subong nakatipon na sang 3,550 ka pirma.

Korapsyon sa budget para sa 2026, ginpamatukan. Nagprotesta sadtong Septyembre 10 sa atubang sang Senado ang mga pungsodnon demokratikong organisasyon, agud kundenahon ang pagratsada sang budget sang Office of the President sa kongreso gamit ang tabon nga “parliamentary courtesy”. Suno sa mga grupo, puno sang korapsyon ang budget para sa 2026. Ginpasakaan ang budget para sa modernisasyon sang AFP, confidential and intelligence funds kag NTF-Elcac, samtang ginbuhinan ang budget para sa serbisyo sa ikaayong lawas kag halos wala sang pagsaka para sa budget sa edukasyon.