Waray hunong an pagsabrag han kamadarahug han armado nga mga pwersa han estado ha katawhan nga naninindugan para ha ira mga katungod.

Panganganyon. Kabutngaan han gab-i hadton Septyembre 9 tubtub aga han Septyembre 10 nagbuhi han mga bala ngan nanganyon an 203rd IBde ha Sityo Tugas ngan kasapit nga mga komunidad ha Barangay San Vicente, Roxas, Oriental Mindoro. Gintarget han pangistraping ngan panganyon diri la an mga kagugub-an kundi an mga tanuman, komunidad han mga minoriya nga Mangyan, ngan mga lugar nga gintatahapan nira nga gin-atrasan han hukbo han katawhan nga ira naka-engkwentro.

Bunga hini, napiritan nga mag-ebakwet an gatus-gatos nga minoriya nga Mangyan kaupod an mga bata, kababayin-an, ngan kalagsan nga taga-Sityo Tugas ngan Sityo Swerte han Barangay San Vicente ngan mga kasapit pa nga kabablayan.

Pangaresto. Hadton Septyembre 16, gin-aresto han mga pulis an upat nga residente han Catmon, Malabon City ha mga kaso nga perjury ngan grave coercion, samtang usa nga nadabi pa ha kaso an sinurender. An mga iginpriso membro han Sandigan Nagkakaisang Mamamayan sa Upper Catmon nga natipa ha plano nga demolisyon ngan panlulupot han tuna ha barangay.

Pangigipit. Ha naglabay nga mga semana, ginsarbeylans ngan iginpatawag han mga pulis an pito nga membro han Amihan-Cagayan agud ipailarum ha interogasyon ngan piriton nga gumikan ha ira organisasyon. Kaupod ha ira an lider-kababayin-an nga hi Emilia Ventula.

Ha Negros Occidental, nahireport an pwersahay nga pagsulod han mga pwersa han estado ha balay ngan gintarhug an duha nga parag-uma ha Barangay Macagahay, Moises Padilla ngan Barangay Marcelo, Calatrava. Sugad liwat an ginhimo ha balay han mga residente han Barangay Linantuyan ngan Barangay Trinidad ha Guihulngan City. Ginkadto hira ha kabutngaan han gab-i, iginpailarum ha interogasyon ngan gintutukan han pusil.

Ha Panay, gin-akusaran han 3rd IB an lider han Paghugpong sang mga Mangunguma sa Panay kag Guimaras (PAMANGGAS) nga hi Lucia Capaducio komo usa nga rebelde nga “at large” (mayda kaso ngan diri pa nadadakop) dara han pagkamartir han iya anak nga Pula nga mangaraway.