Awan sardeng ti panangimula ti kinaranggas dagiti armado a pwersa ti estado iti umili a tumaktakkder para kadagiti karbengan da.

Panagkanyon. Dis-oras ti rabii idi Setyembre 9 inggana’t kabigatan ti Setyembre 10 ket nangibulos iti bala ken nagkanyon ti 203rd IBde iti Sityo Tugas ken kabangibang a komunidad ti Barangay San Vicente, Roxas, Oriental Mindoro. Tinarget ti panagistraping ken panagkanyon saan laeng nga iti kabakiran no di ket di karaman dagiti mula, komunidad dagiti katutubo a Mangyan, ken dagiti lugar a pagat-atapan a nagatrasan ti NPA a nakalaban da. Gapu iti daytoy, napilitan a nagbakwit ti ginasut a katutubo a Mangyan karaman dagiti ubbing, babbai, ken dagiti nataengan a taga-Sityo Tugas ken Sityo Swerte ti Barangay San Vicente ken dagiti asideg a kabalbalayan.

Panangaresto. Idi Setyembre 16, inaresto dagiti pulis ti uppat a residente ti Catmon, Malabon City kadagiti kaso a perjury ken grave coercion, kabayatan na a maysa ti simmuko a nairaman ti kaso. Dagiti naibalud ket myembro ti Sandigan Nagkakaisang Mamamayan iti Upper Catmon a mangsupsupiat ti plano a demolisyon ken panangagum ti daga iti barangay.

Panangpilit. Iti napalabas a lawas, tiniktikan ken pinaayaban dagiti pulis dagiti pito a myembro ti Amihan-Cagayan tapno ipauneg iti interogasyon ken piliten nga umikkat iti organisasyon. Maysa kadakuada ni Emilia Ventula maysa a lider-kababaihan.

Iti Negros Occidental, naireport nga pinilit a sinerrek dagiti pwersa ti estado iti balay ken pinangtaan da ti dua a mannalon iti Barangay Macagahay, Moises Padilla ken Barangay Marcelo, Calatrava. Kastoy met laeng ti inaramid iti balay dagiti agindeg ti Barangay Linantuyan ken Barangay Trinidad iti Guihulhan City. Simrek da iti katengngaan ti rabii, impauneg ida iti interogasyon ken tinutukan ti paltog.

Iti Panay, inakusaran ti 3rdIB ti lider ti Paghugpong sang mga Mangunguma sa Panay kag Guimaras (PAMANGGAS) a ni Lucia Capaducio kas maysa a rebelde nga adda kaso ken “saan pay a natiliw” gapu ti panagmartir ti anak na a Nalabaga a mannakigubat.