Nahireport ha naglabay nga mga semana an pira nga nakab-ot nga kadaugan ngan nagpapadayon nga pag-ato han mga residente ha mga mapanhibang nga pagmimina ngan dredging ha Ilocos Sur, Kalinga, Nueva Vizcaya, Mindoro ngan Sorsogon.

Ha Ilocos Sur, naduso han duruyog nga paggios han katawhan an lokal nga gubyerno nga magyakan ngan magpahayag han pagpapaundang ha operasyon han mapanhibang nga operasyon nga dredging han Isla Verde Mining and Development Company ha gibwangan han Lower Abra River ha lupgop han prubinsya. Hadton Septyembre 2, nagpahayag an lokal nga gubyerno nga pauundangon an operasyon bunga han duruyog ngan waray hunong nga paggios han mga komunidad.

Ha Kalinga, nahipabasura han mga minoriya an igin-gawas nga bogus nga Free, Prior and Informed Consent para ha Saltan Dam nga proyekto han kompaniya nga Australian nga JBD Water Power Inc. Nahibaruan ini han mga residente hadton Septyembre 15 kadungan han pagsalawad nira han mga petisyon ha National Commission for Indigenous Peoples agud ipabasura an FPIC para ha Saltan Dam ngan Upper Tabuk Hydropower Project (UTHP). Iginbalita liwat ha ira nga an FPIC para ha UTHP posible liwat bawion ngan ipabasura.

Ha Nueva Vizcaya, nagbarikada an mga residente han Barangay Bitnong, Dupax del Norte ha ira katunaan tikang Septyembre 17 agud ulangan an pagpasulod han mga gamit ha pagmimina han Woggle Corporation, usa nga kompaniya nga nakabase ha United Kingdom. Tungod ha hiluagan nga pagtipa han katawhan ha plano nga eksplorasyon, temporaryo nga ginpahunong han kompaniya an ira operasyon.

Ha Oriental Mindoro, iginlansar an usa nga prayer rally hadton Septyembre 6 ha merkado ha bungto han Gloria agud tipahan an dredging ha isla. Tinambong ha paggios an magkalain-lain nga asosasyon, organisasyon, singbahan, mga pulitiko, ngan residente tikang Calapan City tubtub Bansud. Sering nira, sobra nga nakakahibang ha baybayon ngan hulga ha pakabuhi han mga parupangisda an dredging.

Ha Sorsogon, nahipasuspendir han mga residente hadton Septyembre 10 an permit han Siating Construction and Development Corporation para ha pagkwari han bato ngan baras ha Barangay San Roque ha bungto han Bulusan. Iginbasar han gubernador an desisyon ha ginsalawad nga position paper han San Roque Ecological Initiative han Barangay San Roque. Sering han mga residente, iligal an kwari tungod kay waray pampubliko nga konsultasyon. Hirani liwat ini ha Bulusan Volcano Natural Park (BVNP), nga usa nga protected area.