Naipadamag iti napalabas a lawas ti sumagmamano a balligi ken agtultuloy a panaglaban dagiti residente kadagiti makadadael a panagmina ken dredging iti Ilocos Sur, Kalinga, Nueva Vizcaya, Mindoro ken Sorsogon.

Iti Ilocos Sur, naiduron ti nagkaykaysa a panagtignay ti umili ti lokal a gubyerno nga agsarita ken mangipaduyakyak ti panagsardeng iti operasyon ti makadadael nga operasyon ti dredging ti Isla Verde Mining and Development Company iti wangawangan ti Lower Abra River iti masakupan ti probinsya. Idi Setyembre 2, nagsarita ti lokal a gobyerno nga ipasardeng ti operasyon gapu’t sangkamaysa ken awan sarday a panagtignay dagiti komunidad.

Iti Kalinga, naipabasura dagiti katutubo ti nairuar a bogus a Free, Prior and Informed Consent para iti Saltan Dam a proyekto ti Australian a kumpanya a JBD Water Power Inc. Naduktalan daytoy dagiti residente idi Setyembre 15 kagiddan ti panangiyuli da kadagiti petisyon iti National Commission for Indigenous Peoples tapno ipaibasura ti FPIC para iti Saltan Dam ken Upper Tabuk Hydropower Project (UTHP). Naipadamag met laeng kadakuada a ti FPIC para iti UTHP ket posible met a maibabawi ken maibasura.

Iti Nueva Vizcaya, nagbarikada dagiti residente ti Barangay Bitnong, Dupax del Norte kadagiti dagdaga da manipud Setyembre 17 tapno lappedan ti panangiserrek kadagiti mausar iti panagmina ti Woggle Corporation, maysa a kumpanya a nakabase iti United Kingdom. Gapu iti nasaknap a pananglapped dagiti umili iti plano nga eksplorasyon, temporaryo nga insardeng ti kumpanya dagiti operasyon da.

Iti Oriental Mindoro, naisayangkat ti maysa a prayer rally idi Setyembre 6 iti pagdadapunan iti ili ti Gloria tapno lappedan ti dredging iti isla. Dimmar-ay dagiti nagduduma nga asosasyon, organisasyon, simbaan, pulitiko ken dagiti agindeg manipud Calapan City aginggana Bansud. Iti kunada, nakaro a makadadael iti igid baybay ken pangta iti pangkabiagan dagiti mangngalap ti dredging.

Iti Sorsogon, naipasuspinde dagiti residente idi Setyembre 10 ti permit ti Siating Construction and Development Corporation para iti panagkwari ti bato ken darat iti Barangay San Roque iti ili ti Bulusan. Inbasar ti gobernador ti desisyon iti indatag a papel ti San Roque Ecological Initiative ng Barangay San Roque. Kinuna dagiti residente iligal ti kwari gapu ta awan konsultasyon iti publiko. Asideg met laeng daytoy iti Bulusan Volcano Natural Park (BVNP), maysa a protected area.