Ha butnga han mas natikagrabe pa ngan dirudiretso nga mga operasyon militar han Armed Forces of the Philippines (AFP) ha kabaryuhan, nakapaghimo an Bagong Hukbong Bayan (BHB) han mga armado nga aksyon ngan aktibo nga depensa ha Negros, Quezon, ngan Mindoro.

Ha Negros Occidental, ginpabuthan han BHB-Northern Negros (Roselyn Jean Pelle Command) an nag-ooperasyon nga tropa han 79th IB ha Purok 5, Barangay XI (Gawahon), Victorias City hadton Septyembre 14 han gab-i. Nasamaran an pira nga sundalo, nga nagseserbe nga protektor han agaron maytuna nga nanlulupot han tuna.

Ha Quezon, utro nga ginpabuthan han BHB-Quezon (Apolonio Mendoza Command) hadton Septyembre 4 han gab-i an bag-o nga tindog nga kampo militar han 85th IB ha Barangay Cogorin Ibaba, Lopez. Ikaduha kabeses na nga gin-atake han BHB an kampo nga iginkalipay han mga residente.

Ha report diri pala maiha han BHB-Southwest Negros (Armando Sumayang Jr Command), ginpabuthan hini an nagkakampo nga tropa han 15th IB ha Sityo Patol, Barangay Caliling, Cauayan, Negros Occidental hadton syahan nga semana han Agosto.

Aktibo nga depensa. Nakaglansar hin kontra-atake an BHB-Mindoro (Lucio de Guzman Command) kontra ha naatake nga tropa han 1st IB ha Sityo Tugas, Barangay San Vicente, Roxas, Oriental Mindoro hadton Septyembre 9. Sigon ha yunit, dayon hini nga nabantayan an presensya han pwersa han 1st IB sanglit dagmit nga nakapangandam, nakapusisyon ngan nakapagpabuto an mga Pula nga mangaraway.

Napatay ha agway an usa nga sundalo ngan nasamaran an duha nga iba pa. Samtang, ginpasidunggan han BHB-Mindoro hi Ka Kardo, 33, Pula nga mangaraway nga namartir samtang mabayanihon nga nakikig-away ha mga pasista.