Piket kontra panagngato iti singir ti danum. Nagpiket ti Bayan-Panay iti upisina ti Metro Iloilo Water District idiay Iloilo City idi Oktubre 20 tapno babalawen ti naituding a panagngato ti singir ti danum. Ti Metro Pacific Iloilo Water ket agingato ti singir a 26% agturong ti ₱25.2 kada metro kubiko iti Nobyembre ken agbalin a ₱28.67 kada metro kubiko inton Marso 2026, manipud iti agdama a ₱20 kada metro kubiko.

NCIP iti Pampanga, pinampag dagiti Ayta. Nagturong dagiti katutubo nga Ayta ken dadduma pay a sektor iti upisina ti NCIP Regional Office idiay San Fernando, Pampanga idi Oktubre 23. Nagipeksa da ti panagsupyat kadagiti proyekto nga agkamkamkam iti ansestral a daga da kas kadagiti operasyon a kwari, minas, golf course ken solar farm. Sakbay ti tignay, intakder dagiti Ayta ti organisasyon da a Mansaway ken ti Pamilalamu a timpuyog dagiti katutubo ken simbaan.

Kabataan a Mindanaoan para iti Palestine. Nagiruswat ti tignay dagiti estudyante iti Mindanao State University-Iligan Institute of Technology idiay Iligan City ken University of Science and Technology of Southern Philippines idiay Cagayan de Oro City idi maudi a lawas ti Oktubre kas pannakikaykaysa iti umili a Palestino. Binabalaw da ti henosidyo ti Zionista nga Israel ken ti imperyalista a US laban kadagiti Palestino iti Gaza.

Panagsupyat iti pribatisasyon iti tyendaan idiay Baguio City. Nagtignay dagiti residente ti Baguio City idi Oktubre 26 tapno supyaten ti pribatisasyon wenno inawagan da a “mallification” ti SM Prime Holdings ken lokal a gubyerno iti pangpubliko a tyendaan iti syudad. Nagisayangkat dagiti grupo ti nadumaduma nga aktibidad kas panawagan para iti inklusibo ken nakasentro iti komunidad a panagdur-as iti syudad.