Piket batok sa taas nga singil sa tubig. Nagpiket ang Bayan-Panay sa upisina sa Metro Iloilo Water District sa Iloilo City niadtong Oktubre 20 aron makmakon ang gikatakdang pagtaas sa singil sa tubig. Magtaas og 26% ang Metro Pacific Iloilo Water ngadto sa ₱25.2 kada cubic meter sa Nobyembre ug mahimong ₱28.67 kada cubic meter sa Marso 2026, gikan sa kasamtangang ₱20 kada cubic meter.

NCIP sa Pampanga, gidagsang sa mga Ayta. Midangsang sa upisina sa NCIP Regional Office sa San Fernando, Pampanga niadtong Oktubre 23 ang mga katutubong Ayta ug ubang sektor. Nagpadayag sila og pagsupak sa mga proyektong nangawkaw sa ilang yutang kabilin sama sa mga operasyon sa kwari, mina, golf course, ug solar farm. Sa wala pa ang protesta, gitukod sa mga Ayta ang ilang organisasyon nga Mansaway ug ang Pamilalamu, kahugpungan sa mga katutubo ug simbahan.

Kabatan-onan sa Mindanao para sa Palestine. Naglunsad og aktibidad ang mga estudyante sa Mindanao State University-Iligan Institute of Technology sa Iligan City ug University of Science and Technology of Southern Philippines sa Cagayan de Oro City sa ulahing semana sa Oktubre isip pakighiusa sa katawhang Palestino. Gimakmak nila ang henosidyo sa Zionistang Israel ug imperyalistang US batok sa mga Palestino sa Gaza.

Pagsupak sa pribatisasyon sa merkado sa Baguio City. Milihok ang mga residente sa Baguio City niadtong Oktubre 26 aron supakon ang pribatisasyon o gitawag nilang “mallification” sa SM Prime Holdings ug lokal nga gubyerno sa publikong merkado sa syudad. Naglunsad ang mga grupo og lain-laing aktibidad isip panawagan alang sa inklusibo ug nakasentro sa komunidad nga kalamboan sa syudad.