Mapangngeddeng a rimrimbawan ti Katipunan ng mga Gurong Makabayan (Kaguma) dagiti nagkapuyan ken nagkamalian daytoy kadagiti napalabas a tawen, iti inspirasyon ti tignay panagilinteg ti rebolusyonaryo a tignay. Pammaneknek daytoy ti panang-angay ti rebolusyonaryo a grupo dagiti manursuro ti Maikapat a Nailyan a Kongreso da idi Oktubre.

Nagurnong ti saan a bumaba iti 79 a kameng manipud kadagiti balangay ti Kaguma manipud iti nadumaduma a rehiyon, akademiko nga institusyon ken unibersidad iti sektor ti edukasyon para iti konggreso. Nagkaykaysa dagiti delegado iti tema nga “Abante rebolusyonaryo a tignay ti manursuro! Agilinteg! Agpalawa! Makidangdang! Agballigi! Ipan amin a kabaelan nga iyabante ti demokratiko a rebolusyon ti umili nga addaan sosyalista a perspektiba!”

Nasurok dua a dekadan ti napalabas manipud idi nairuswat ti maudi a konggreso ti grupo. Dagiti umuna a konggreso daytoy ket naaramid idi 1985, 1987 ken 2003. Naitakder ti grupo idi Marso 28, 1971.

“Balbaliw nga ibangon ti Kaguma, agresibo nga agpalawa ken agpapigsa iti intero a pagilyan. Sipipinget nga iyabante dagiti komprehensibo a rebbengen para iti rebolusyon,” segun iti Nailyan a Kalihiman iti ulat daytoy iti panagrugi ti kongreso.

Iti taripnong, inyulat ti kalihiman ti panagsuma ti Kaguma iti bukod daytoy nga organisasyon iti napalabas a dua a dekada. Nalatak ditoy ti napakumbaba a panagdillaw iti bagi iti panagibbat da iti basaran a prinsipyo ti rebolusyonaryo nga organisasyon ken kadagiti wagas daytoy kadagiti napalabas a tawen.

Naipinal ken napagkaykaysaan ti konggreso dagiti napateg a dokumento ti Kaguma kabilang ti oryentasyon, pamunganayan linteg ken tallo a tawen a taktikal a plano daytoy. Nabalangkas iti konggreso ti innem a resolusyon a tumarabay iti tuluy-tuloy a panagabante ti organisasyon.

Nagbotos met ti konggreso ti baro a Nailyan a Konseho ken Nailyan a Komite nga Ehekutibo a tumakder a daulo ti organisasyon iti intero a pagilyan. Napili ni Guia Umili kas pangulo ken tagapagsarita ti Kaguma.

Kinablaawan ti National Democratic Front of the Philippines ken Communist Party of the Philippines (CPP) ti pangngeddeng ken panagpursigi ti Kaguma iti panang-angay ti Maikapat a Nailyan a Konggreso daytoy.

“Mangnamnama kami nga iti daytoy a konggreso ket makonsolida yon ti intar yo, makaadaw kadagiti adal manipud kadagiti kapadasan ken natibtibker nga umabante iti panagtungpal kadagiti rebbengen iti panangpapigsa ti rebolusyonaryo nga intar dagiti manursuro,” pablaak ni Elias Dipasupil, kabuklan a kalihim ti NDFP.

Segun ken Marco Valbuena, pangulo nga upisyal iti impormasyon ti CPP, awan dudua nga istorikal ti nairuswat a konggreso, saan laeng a gapu ta naangay daytoy kalpasan ti atiddog a panawen, nu di ket gapu ta sigurado a rugi daytoy ti baro a panawen ti panagabante iti nangatngato a tukad ti rebolusyonaryo a tignay ti manursuro.

Kuna ni Valbuena, ti Kaguma ket agserserbi a raya para kadagiti manursuro a mangmangted lawag iti dana a rumbeng da a dalyasaten tapno magun-od ti tarigagay da iti intero a pagilyan. “Iti panagpinget yo, ik-ikkan yo ti inspirasyon dagiti manursuro tapno tuman-aw labes iti agdama a kinarigat, ken makikaykaysa iti dangadang ti nalawlawa nga umili tapno naan-anay a baliwan ti urnos ti gimong,” mensahe na iti Kaguma.

Iti panagleppas ti konggreso, sangsangkamaysa a nagsapata dagiti kameng ken dagiti baro a nabotosan a dadaulo a sinaruno ti panggibus a panagsarita ti pangulo. Iti bitla na, bingbig ken pinadayawan ti pangulo a ni Umili dagiti martir ti sektor ken ti umili. “Isuda a nagidaton ken nagibuwis ti sibubukel a biag para iti rebolusyon. Padayawan tayo dagiti kakadwa tayo nga adda iti kaaw-awayan, ken mangig-iggem ti nangato a klase ti dangadang,” kunana.

Nagibati met ti karit kadagiti delegado ti konggreso ni Umili: “Sapay koma ta agtuloy a pumigsa ti panagsilpo ti rebolusyonaryo a teorya ken praktika tayo; sapay koma ta dagiti dokumento ken innadal ket saan a nakasardeng a kaamwan a nakaimbak laeng iti panunot tayo nu di ket agbalin a tarabay iti panangpadur-as ti panagtignay tayo ken ti panagtignay met ket iduron tayo iti nangatngato a tukad ti rebolusyonaryo a teorya.”