Rumbeng a sipipigsa a sidiren ken labanan ti binukel ti imperyalista a US a Task Force Philippines nga aramaten daytoy iti nakarkaro a pannakibiang militar iti pagilyan. Iti panangbukel ti Task Force Philippines, ad-adda a garapal a konkontrolen ti US ti Armed Forces of the Philippines (AFP) ken dadduma pay a pwersa a pangseguridad ti estado a neokolonyal tapno agserbi iti heyopulitikal nga interes ti US iti Asia.

Ti Task Force Philippines ket maysa a baro a yunit militar ti US a nakabase iti Pilipinas. Panggep daytoy nga ikeddeng ti direksyon, plano ken dagiti operasyon ti AFP iti “depensa a pangruar” manipud iti South China Sea agingga iti Luzon Strait, laban iti “managpwersa ken agresibo” kano a tignay ti China iti kabaybayan.

Dakkel nga inuulbod ti deklarado a panggep daytoy a “papigsaen ti panagtinnulong ti US ken Pilipinas.” Nakakatkatawa nga inamin mismo ti hepe ti AFP nga awan ti ammo na a detalye ti daytoy a plano a task force ti US. Ti laeng ammo na ket nakabasar daytoy iti konsepto ken operasyon ti Task Force Ayungin nga intakder ti US idi napan a tawen.

Naitakder daytoy nga umuna a task force idi 2024 ken binukel dagiti upisyal militar ti US. Daytoy ti nagplano kadagiti operasyon a “re-supply” ti AFP iti barko daytoy a BRP Sierra Madre a nakasardeng iti Ayungin Shoal. Inpatulod ti US ti ramit militar ken armas na, ken sinuportaran na ti sarbeylans a pangtangatang ken panglaw-ang (satellite). Iti ababa a sarita, dagiti “resupply mission” ti AFP ket dagiti operasyon a pangbaybay a direkta a mandar ken kontrol ti US.

Ti panangbukel ti Task Force Philippines ket kaudyan nga iskema ti imperyalista a US ken tanda ti nangatngato a tukad ti pannakibiang daytoy iti pagilyan. Agserserbi daytoy iti balangkas ti Indo-Pacific Strategy ti US iti plano a palikmutan ti imperyalista a karibal daytoy a China, ken lapdan ti ad-adda a panagpigsa ti bileg daytoy iti militar ken ekonomya.

Manon a tawen nga us-usaren ken rubrubroban ti US ti susik a pangbaybay ti US ken China, tapno ikalintegan ti panagaramat iti Mutual Defense Treaty ken dadduma pay a saan a patas a katulagan militar tapno papigsaen ti presensya dagiti pwersa militar daytoy iti Pilipinas. Intakder daytoy ti saan a bumaba iti siyam a base militar ti US a mabigbigbig iti sidong ti Enhanced Defense Cooperation Agreement (EDCA).

Ad-adu pay ti saan nga ak-aklunen ti US a base ken pasilidad na iti nadumaduma a paset ti pagilyan, kabilang ti intakder ti AFP a pasilidad iti Mavulis Island idiay Batanes tapno maaramat ti US. Adda met ti presensya ti militar ti US kadagiti pasilidad idiay Ilocos Norte, Aurora, Quezon, Mindoro, Panay ken nadumaduma a paset ti Palawan. Aggigyan kadagitoy a pasilidad dagiti upisyal ken soldado nga Amerikano, wenno pagiyis-istayonan kadagiti armas kas ti Typhon missile system ken dadduma pay a makadadael nga armas. Balak met ti US nga itakder iti pagilyan dagiti pabrika ti bala, drone ken dadduma pay nga armas. Nayon pay ditoy ti plano ti US nga agitakder ti refuelling depot iti nalawa a kabaybayan ti Davao Gulf.

Permanente met ti presensya dagiti barko a panggubat ti US iti kabaybayan a sakop ti Pilipinas, kabilang dagiti higante nga aircraft carrier a nakaluganan ti rinibo a soldado nga Amerikano. Nawaya daytoy nga aglaylayag ken agsangsanglad iti anyaman a paset ti Pilipinas. Maus-usar dagitoy iti agsasaruno ken agrarapin a panagsanay iti gera a maisaysayangkat iti Pilipinas, a puro nakaturong iti senaryo ti panagbettak ti gubat iti China.

Ni Marcos ket napeklan nga aso-aso iti amo na nga imperyalista a US. Ad-adda pay a nagbalin isuna a paspasurot gapu iti desperasyon na nga alaen ti suporta ti US. Daytoy ket iti sango ti agburburek a krisis iti pulitika nga intunda ti naibutaktak a higante a kaskaso ti korapsyon ken agtultuloy a nalawa a tignay protesta laban iti rehimen na.

Iti pulong ti ASEAN itay nabiit, ni Marcos ti nagserbi a para-awit iti adyenda ti US, ken induron na ti “enhanced defense cooperation” dagiti pagilyan iti Southeast Asia laban iti “pangta ken agresyon” ti China. Nasupalpal ni Marcos idi awan uray maysa a sumupsuporta iti gakat na.

Umannurot iti mandar ti US, agsasaruno a sinerrek ni Marcos dagiti katulagan a “visiting forces” iti Japan ken Canada, nga agpada a pagilyan nga addaan alyansa a militar iti US. Gagem daytoy a palubosan nga usaren dagitoy a pagilyan ti teritoryo a pangbaybay ken kadagaan ti Pilipinas para kadagiti kasilpo-ti-US nga operasyon a militar. Tatta met ket ipanpannakkel ni Marcos a gumatang isuna kadagiti ramit panggubat iti US tapno kano makalaban iti makabulan sakbay a dumawat ti tulong ti sabali a pagilyan.

Maitunos iti adyenda ni Marcos, agtigtignay ti nadumaduma a maka-US a partido, organisasyon, dagiti institusyon ken paset ti masmidya tapno suportaran ti dumakdakkel a presensya a militar ti US iti Pilipinas, iti linged ti “panangsalaknib” iti West Philippine Sea. Dagitoy ket bin-ig a ponpondoan ti imperyalismo a US a dumaldalan kadagiti institusyon kas ti National Endowment for Democracy ken agay-ayus kadagiti grupo kas ti “INCITEgov.” Idi 2023, nagilatang met ti gubyerno a US ti $1.6 bilyon para iti 5-tawen a programa para iti “propaganda a kontra-China.”

Paypaypayan na met ti Sinophobia wenno ti gura iti amin nga addaan pakainaigan iti China. Kas ken Marcos, parparwaren da nga adda ti pangta ti “panagsakop” ken “agresyon” ti China, ngem naulimek nu kasano a ti Pilipinas ket agtaltalinaed a neokolonya ti imperyalismo a US. Parparwaren da a “maka-China” ti siasinoman a sumupsupyat kadagiti pannakibiang militar ti US iti Pilipinas.

Agpospostura tatta dagiti Duterte a kontra-US tapno gaburan ti pakaseknan ti korapsyon a pakairamanan ti pamilya da. Ubbaw daytoy a postura. Idi adda iti poder, awan ti inaramid ni Rodrigo Duterte tapno ipaserra dagiti EDCA site ken ilayon nga ibasura ti VFA ken dagiti katulagan militar iti US. Winayawayaan na ti soldado nga Amerikano a nangpapatay ken Jennifer Laude. Naulimek tatta dagiti Duterte iti plano ti US nga itakder a refuelling depot iti Davao Gulf.

Iti sango ti pumigpigsa a duron ti US tapno mangsugsog iti gubat ken guyuden wenno usaren ti Pilipinas iti pananggubat iti China, nairut ti pagkasapulan nga agkaykaysa ti umili tapno agtignay ken labanan daytoy.

Kasapulan a papigsaen ti pukkaw ti umili tapno dupraken ti amin a base militar ti US, ikkaten ti amin a misayl ti US kadagiti sikreto a lokasyon iti Pilipinas ken papanawen dagiti makibibiang a pwersa militar ti US iti pagilyan. Nasken nga isilpo daytoy a pukkaw iti dangadang ti umili tapno makaruk-at kadagiti kuko ti imperyalismo a sumipsippayot, gun-oden ti panagwaywayas ken ibangon ti pagilyan a nawaya ken nadur-as.