Laban ti mangmangged iti Wyeth Philippines. Balbaliw a nagprotesta dagiti mangmangged iti panangiyuna ti Wyeth Philippines Progressive Workers Union-DFA-KMU iti sango ti planta ti kumpanya idiay Cabuyao City, Laguna idi Oktubre 24. Kinundenar da ti agtultuloy a panagkedked ti kapitalista a sungbatan ti awag da para iti nainkalintegan a sweldo ken regularisasyon iti dandani uppat a bulanen a negosasyon para iti collective bargaining agreement (CBA).

Sweldo ken karbengan, panawagan a respetaren idiay Kowloon. Nagpiket dagiti mangmangged ti Kowloon House West iti ruar ti restawran idiay West Avenue, Quezon City iti panangiyuna ti Kowloon House West Chapter ti Glowhrain-KMU idi Oktubre 24. Kinundenar ti unyon ti inawagan daytoy nga agdadata a saan panangbigbig ti maneydsment iti karbengan dagiti mangmangged ken panaglabsing iti CBA da. Segun iti unyon, napaay ti restawran nga ipatungpal dagiti prubisyon ti CBA kas ti across-the-board a pangngato ti sweldo maitunos iti mandar ti regional wage board ken usto a proseso kadagiti kaso ti panagdisiplina. Saan met a mangmangted daytoy ti kaskenan a benepisyo ken proteksyon.

2 unyon iti UA&P, agsagsagana nga agwelga. Nagisumite ti ulat ti strike vote ti University of Asia and the Pacific (UA&P) Union of Faculty Members ken UA&P Union of Allied Employees iti National Conciliation and Mediation Board (NCMB) idi Oktubre 27. Sungbat daytoy ti dua nga unyon iti panagkedked ti administrasyon ti unibersidad iti panawagan a nayon a sweldo, benepisyo ken nasayaat a kasasaad iti trabaho. Uppat a bulanen ti pannakiareglo dagiti unyon iti administrasyon iti tukad ti NCMB ngem agtaltalinaed a natangken ken tuleng daytoy iti awag da.