Piket kontra saka-sukot sa tubig. Nagpiket ang Bayan-Panay sa opisina sang Metro Iloilo Water District sa Iloilo City sadtong Oktubre 20 agud batikuson ang natalana nga pagpasaka sang sukot sa tubig. Magapasaka sang sukot ang Metro Pacific Iloilo Water sang 26% padulong sa ₱25.2 kada cubic meter sa Nobyembre kag mangin ₱28.67 kada cubic meter sa Marso 2026, halin sa subong ₱20 kada cubic meter.

NCIP sa Pampanga, gin-uyog sang mga Ayta. Nagkadto sa opisina sang NCIP Regional Office sa San Fernando, Pampanga sadtong Oktubre 23 ang mga tumandok nga Ayta kag iban pa nga mga sektor. Nagpahayag sila sang pagpamatuk sa mga proyekto nga nagapang-agaw sa ila duta nga ginpanubli kaangay sang operasyon kwari, mina, mga golf course kag solar farm. Antes ang hublag, gintukod sang mga Ayta ang ila organisasyon nga Mansaway kag ang Pamilalamu, asosasyon sang mga tumandok kag simbahan.

Mga pamatan-on Mindanaoan para sa Palestine. Naglunsar sang hublag ang mga estudyante sa Mindanao State University-Iligan Institute of Technology sa Iligan City kag University of Science and Technology of Southern Philippines sa Cagayan de Oro City sadtong ulihi nga semana sang Oktobre bilang pakig-isa sa pumuluyong Palestino. Ginbatikos nila ang henosidyo sang Zionistang Israel kag sang imperyalistang US batuk sa mga Palestino sa Gaza.

Pagpamatuk sa pribatisasyon sa merkado sa Baguio City. Nag-aksyon ang mga residente sang Baguio City sadtong Oktobre 26 para pamatukan ang pribatisasyon ukon ginatawag nila mga “mallification” sang SM Prime Holdings kag lokal nga gobyerno sa pangpubliko nga merkado sa syudad. Naglunsar sang lain-lain nga tipo sang aktibidad ang mga grupo bilang panawagan para sa inklusibo kag nakasentro sa komunidad nga pag-uswag sang syudad.