Naituding a mairuswat ti maysa a higante a protesta ti umili kontra korapsyon iti Luneta Park idiay Manila ken dadduma pay a paset ti pagilyan inton Nobyembre 30. Ti tignay ket idaulwan ti baro a takder a Kilusang Bayan Kontra Kurakot (KBKK) nga inbunga ti protesta ti 100,000 indibidwal iti naawagan a Layus iti Luneta idi Setyembre 21. Ti awag ti grupo: “Amin a karaman, rumbeng nga agsungbat!”

Segun iti KBKK, iti laeng panagpasungbat iti amin a karaman iti anomalya a magibusan ti sistematiko a korapsyon a mangpespeste iti umili. Kabilang iti “amin” ni Presidente Marcos a nangbukel ken nangaprubar iti tinawen a badyet a natatek ti anomalya ken ni Bise Presidente Duterte a nakasaklang iti pananggastar iti ginasut a milyon a confidential and intelligence funds.

Iti intero a Nobyembre, linawas nga isayangkat dagiti kameng ti KBKK ti Black Friday Protest, dagiti piket ken panagkalampag kadagiti komunidad, unibersidad, pabrika, palengke ken kadagiti paguummongan ti umili. Idaulwan met daytoy dagiti porum, dadakkel a pulong ken panangiyukrad kadagiti istrimer tapno danunen ti ad-adu a Pilipino.

Idi Oktubre, agsasaruno dagiti inyaramid a protesta ken aktibidad dagiti organisasyon iti sidong ti KBKK. Nagmartsa manipud Liwasang Bonifacio agturong Mendiola idiay Manila ti rinibo a mannalon, karaman ti dadduma a demokratiko a sektor idi Oktubre 21. Panawagan da ti pudno a reporma iti daga ken panagpasungbat iti rehimen Marcos iti kunniber. Napasamak met dagiti tignay idiay Cebu, Bacolod, Davao ken Santiago City idiay Isabela, ken kadagiti prubinsya ti Southern Tagalog ken Panay. Simmuporta kadagiti mannalon ken nagisayangkat ti “global kalampagan” dagiti migrante a Pilipino manipud iti US, Canada, Australia, United Kingdom, Japan, Hong Kong ken South Korea.

Idi Oktubre 24 nga inyaramid ti Bayan-NCR ti Black Friday Protest kadagiti syudad ti Manila, Quezon, Taguig ken Valenzuela. Naangay met ti kapada nga aktibidad idiay Laguna ken Albay. Dinarup met dagiti kameng ti Kalikasan-PNE, People Surge ken Kadamay ti compound idiay Taguig City a pagup-upisinaan ti ICI.

Idi Oktubre 27, nagurnong idiay San Juan City dagiti obispo, padi ken pastor manipud iti nadumaduma a denominasyon a nakabase idiay National Capital Region tapno ibangon ti Church People Against Corruption. Kabigatanna, nagprotesta dagiti balangay ti Gabriela iti Nailyan nga Aldaw ti Protesta dagiti Babbai.

Idi Oktubre 30, nagprotesta dagiti mangmangged iti salun-at idiay Quezon City tapno kundenaren ti korapsyon ken umawag ti nayon a sweldo, panagbayad kadagiti benepisyo ken nayon a tauhan kadagiti ospital ti gubyerno. Nagtignay met dagiti estudyante iti UP-Tacloban ken University of Eastern Philippines idiay Northern Samar.

Idi Oktubre 31, balbaliw a nagmartsa dagiti grupo iti sidong ti Bayan iti Mendiola idiay Manila. Insayangkat met iti didiay nga aldaw ti Concerned Artists of the Philippines ti #StopKorap Halloween Party nga addaan tema a “Ghost Projects: The Exorcism!” idiay Quezon City. Napasamak met ti Black Friday Protest idiay Caloocan City ken Pasig City, San Pablo City idiay Laguna ken Cagayan de Oro City.

Pangil ti pasismo

Iti sango ti lumawlawa a pungtot ti umili, tuloy-tuloy ti panaggandat ti rehimen Marcos a pawilan ken kigtoten ti kabataan. Idi Nobyembre 3, naganunsyo ti Philippine National Police-Criminal Investigation and Detection Group (PNP-CIDG) a nagipila daytoy kadagiti kaso iti 97 a saan a nanaganan nga indibidwal kanaig ti protesta idi Setyembre 21 a nagmurdong iti naranggas a panagipawil dagiti pulis.

Nayon kadakwada, uppat a lider-estudyante manipud iti University of the Philippines-Diliman, Polytechnic University of the Philippines ken De La Salle-College of St. Benilde ti pinatulodan ti PNP-CIDG ti subpoena tapno ipasidong iti imbestigasyon. Nagkedked dagiti lider-kabataan a sumango kadagiti pulis. Maysa met a protesta ti inangay da idi Oktubre 27 iti hedkwarters ti PNP idiay Quezon City tapno batikusen dagiti subpoena.

Malaksid ditoy, sangapulo kadagiti naaresto a 270 nga indibidwal idi Setyembre 21 ti inrekomenda ti prosekyutor iti Manila a pormal a sumango iti kaso a tumult and other disturbances of public order. Kabayatanna, naibasura dagiti reklamo nga iligal nga asembliya ken direct assault a naipila kadagiti naaresto gapu iti kinaawan ti naan-anay nga ebidensya.