Makabulanen a kibkiboren ti 12th Civil Military Operation (CMO) Battalion ken NTF-Elcac dagiti residente ti North Caloocan. Agsusumbangir ti inaramid daytoy a Red-tagging, panagespiya ken panaglipit nangruna kadagiti kameng ti progresibo nga organisasyon kadagiti barangay.

Umuna a naideploy ti batalyon iti Barangay 181-182, Pangarap Village idi Oktubre 3 iti linged ti Community Support Program. Plano ti militar a lapdan ti panaglaban ti umili a sumangsango iti pangta ti demolisyon manipud iti pamilya nga Araneta.

Nangrugi nga agkampo ti 12th CMO iti panangidaulo ni 2nd Lt. Julie San Jose iti likod ti covered court ti Barangay 175, Camarin idi Oktubre 6, iti linged ti kapya ken talinaay. Kalpasan ti mano nga aldaw ket sinakop ti operasyon da ti Barangay 187-188 Tala.

Idi Oktubre 28, sinerrek dagiti nagpabigbig a pulis ti upisina ti Gabriela-Caloocan. Nagdeklara da nga adda awit da a warrant of arrest ngem awan ti naipakita da a dokumento. Iti kapada nga aldaw, impaawag ti militar ken kapitan ti barangay dagiti kameng ti Gabriela-Matarik iti barangay hall nu sadinno nga inakusaran da isuda a rekruter ti rebolusyonaryo nga organisasyon.

Inusar met ti NTF-Elcac ti asembliya ti barangay idi Oktubre 18 tapno agipasaknap ti kamali nga impormasyon ken i-Red-tag dagiti organisasyon ti masa. Sipaparang dagiti panagespiya ti militar kadagiti tignay protesta laban iti korapsyon dagiti progresibo a grupo, a naisayangkat idiay Kiko Palengke ken idiay UCC Congressional Village idi Oktubre 10 ken 17.

Agdandanag ti Defend Caloocan a balbaliw a piliten ti militar dagiti kameng ti progresibo a grupo ken dagiti residente a “sumuko” kas ti inaramid ti 12th CMO iti United Vendors Alliance idi 2024.

Ti militarisasyon a mapaspasamak idiay North Caloocan ket maitunos iti National Action Plan for Unity, Peace and Development. Segun iti programa a Capacitating Urban Communities for Peace and Development nga idadauluan ti Department of the Interior and Local Government, dagiti komunidad iti kasyudadan nga addaan nakatakder a patriyotiko nga organisasyon ket maipaspasidong iti sarbeylans, panaglipit ken represyon ti PNP ken AFP.