Piket kontra taas-sukot ha tubig. Nagpiket an Bayan-Panay ha upisina han Metro Iloilo Water District ha Iloilo City hadton Oktubre 20 agud suknaon an nakatalaan nga umento han sukot ha tubig. Mag-uumento han sukot an Metro Pacific Iloilo Water hin 26% ngadto ₱25.2 kada cubic meter ha Nobyembre ngan magigin ₱28.67 kada cubic meter ha Marso 2026, tikang ha presente nga ₱20 kada cubic meter.

NCIP ha Pampanga, ginkalampag han mga Ayta. Kinadto ha upisina han NCIP Regional Office ha San Fernando, Pampanga hadton Oktubre 23 an mga minoriya nga Ayta ngan iba pa nga mga sektor. Nagpahayag hira han pagtipa ha mga proyekto nga nanlulupot ha ira ansestral nga tuna sugad han mga operasyon nga kwari, mina, mga golf course ngan solar farm. Antes an paggios, igintukod han mga Ayta an ira organisasyon nga Mansaway ngan an Pamilalamu, asosasyon han mga minoriya ngan singbahan.

Kabatan-unan nga Mindanaoan para ha Palestine. Naglansar han paggios an mga estudyante han Mindanao State University-Iligan Institute of Technology ha Iligan City ngan University of Science and Technology of Southern Philippines ha Cagayan de Oro City hadton urhi nga semana han Oktubre komo pakig-usa ha katawhan Palestino. Ginsukna nira an henosidyo han Zionista nga Israel ngan han imperyalista nga US kontra ha mga Palestino ha Gaza.

Pagtipa ha pribatisasyon ha merkado ha Baguio City. Gumios an mga residente han Baguio City hadton Oktubre 26 agud tipahan an pribatisasyon o gintawag nira nga “mallification” han SM Prime Holdings ngan lokal nga gubyerno ha pampubliko nga merkado ha syudad. Naglansar han magkalain-lain nga tipo han aktibidad an mga grupo komo panawagan para ha inklusibo ngan nakasentro ha komunidad nga pag-uswag ha syudad.