Siririing ken militante a papaayen dagiti kabataan ken estudyante ti gandat a pannakibiang ti National Task Force-Elcac ken dagiti mabaybayadan a traydor a rebolusyonaryo a tignay kadagiti unibersidad iti linged dagiti “porum” ken “akademiko a diskusyon.”

Idiay UP Mindanao, nag-walkout dagiti lider-estudyante iti kampus iti porum ti TAGBO 2025 idi Oktubre 26 gapu iti panagsingit ken panagsarita ni Arian Ramos, traydor iti rebolusyonaryo a tignay ken maysa kadagiti kadaksan a salaknib iti NTF-Elcac ken Armed Forces of the Philippines. Ni Ramos ken dagiti pada na a traydor ti mangidadaulo iti Red-tagging dagiti lehitimo nga organisasyon ti estudyante ken kadagiti lider da. Nagipatulod ni Ramos ti “bodyguard” nga ahente nga espiya a nangitunda ti nakaro a panagdanag dagiti estudyante.

Dinayaw ti Council of Student Leaders (CSL) ti unibersidad iti panag-walkout dagiti estudyante. Binabalaw da met ti administrasyon ti UP Mindanao a nangipalubos iti pasamak a kunada a maysa nga “isolated” wenno bassit laeng nga insidente. Kunada, mangipakita daytoy iti “pagkapuyan iti institusyon” a siguden a binabalaw da. Nasurok 30 organisasyon a pang-estudyante ti UP Mindanao ti nagpirma iti pablaak ti CSL.

Idiay UST, napaatras ti kolektibo a panagkundenar dagiti estudyante ti partisipasyon koma ti NTF-Elcac iti porum a “Preventing Terror Grooming: The Philippine Experience.” Segun kadagiti progresibo a grupo iti kampus, ti panangawis iti ahensya ket panangrabngis iti dayaw ti unibersidad ken kadagiti Tomasino a mangilablaban iti kinapudno.

Idi Nobyembre 5, nagiyaramid ti protesta dagiti estudyante iti kampus tapno irehisto ti panangbabalaw da iti NTF-Elcac ken iti porum. Numanpay napaatras ti NTF-Elcac, nagserbi latta a bisita ken tagapagsarita iti porum ti mangibagi iti National Security Council ken traydor a ni Arian Ramos idi Nobyembre 6. Nakipagdebate kenkuana ken timmakder kontra Red-tagging ti maysa nga aktibista iti UST.