Kadagiti napalabas a lawas, agsasaruno dagiti ulat ti nakakaasi a kasasaad dagiti Pilipino a migrante a naranggas a makamkamat, maab-abuso, maidepdeport ken mapapaidaman ti hustisya ken karbengan. Iti panagirteng ti sangalubongan a krisis iti ekonomya, isuda ti pagdasdas-alan ti reklamo a panag-agaw ti trabaho, mapabpabasol iti implasyon ken panagngato ti tantos ti krimen kadagiti ayanda a pagilyan.

Idiay Canada, Japan ken Korea, imminget ti panagkamat kadagiti imigrante gubway ti kontra-migrante a polisiya ken kumarkaro a kultura ti rasismo ken xenophobia wenno nakaro a panagbuteng ken disgusto iti gangannaet.

Idiay Taiwan, dumanon iti 169 ti nailista a bilang ti panagrames iti intar dagiti migrante a mangmangged iti pagilyan idi napan a tawen, nu sadinno a 22 kadagiti biktima ket Pilipino. Mayorya kadagiti biktima ket agtrabtrabaho kadagiti pabrika ken kas domestic helper.

Idiay US, 143 Pilipino a marino ti naideport manipud idi napan a tawen. Idi Setyembre, kinanselar ti embahada ti US iti Pilipinas dagiti aprubadon a US visa dagiti marino a pumanaw pay laeng iti pagilyan. Kas kadagiti naipadeport a marino, inusar ti embahada a rason ti pammabasol a kaso a child pornography uray awan ti ebidensya wenno imbestigasyon a naaramid.

Idiay Thailand, nasurok sangagasut a Pilipino a biktima ti “scam-hub trafficking” ti nakadanunen iti pungto ti Myanmar ken agkasapulan ti madagdagus nga arayat ken aksyon.

Idiay Kuwait, saan a naan-anay a hustisya ti nagun-od ti pamilya ni Dafnie Nacalaban, maysa a domestic helper a pinatay ti amo na. Napatawan laeng ti 14 tawen a pannakabalud ti nasao nga amo a nababa a sentensya para iti krimen na.

Idiay The Netherlands, naipaidam met ti hustisya iti 11 a Pilipino a migrante a mangmangged iti desisyon ti Public Prosecution Service nga ibasura ti reklamo da a human trafficking laban iti Saints and Stars Gym a nakabase idiay Amsterdam.

Ti nakaam-ames a kasasaad dagiti migrante ket direkta a bunga ti labor export policy ti reaksyunaryo a gubyerno a Pilipino. Patpatibkeren daytoy a patakaran ti panagbanyaga dagiti mangmangged a Pilipino imbes a sungbatan ti problema ti kinaawan ti trabaho, makabiag a sweldo ken disente a serbisyo sosyal.