Away sang mamumugon sa Wyeth Philippines. Liwat nagprotesta ang mga mamumugon sa pagpanguna sang Wyeth Philippines Progressive Workers Union-DFA-KMU sa atubang sang planta sang kumpaniya sa Cabuyao City, Laguna sadtong Oktobre 24. Ginkundenar nila ang padayon nga pagpamalibad sang kapitalista nga sabton ang panawagan nila sang makatarungan nga sweldo kag regularisasyon sa halos apat ka bulan nga negosasyon para sa collective bargaining agreement (CBA).

Sweldo kag kinamatarung, panawagan nga respetuhon sa Kowloon. Nagpiket ang mga mamumugon sang Kowloon House West sa guwa sang restawran sa West Avenue, Quezon City sa pagpanguna sang Kowloon House West Chapter sang Glowhrain-KMU sadtong Oktobre 24. Ginkundenar sang unyon ang ginatawag sini nga lubos nga pagbalewala sang maneydsment sa kinamatarung sang mga mamumugon kag paglapas sa ila CBA. Suno sa unyon, napaslawan ang restawran nga ipatuman ang mga probisyon sang CBA kasubong sang across-the-board nga pagsaka sang sweldo santo sa mando sang regional wage board kag husto nga proseso sa mga kaso sang pagdisiplina. Wala man ini nagahatag sang nagakadapat nga benepisyo kag proteksyon.

2 ka unyon sa UA&P magawelga. Nagsumiter sang report sang strike vote ang University of Asia and the Pacific (UA&P) Union of Faculty Members kag UA&P Union of Allied Employees sa National Conciliation and Mediation Board (NCMB) sadtong Oktobre 27. Sabat ini sang duha ka unyon sa pagpamalibad sang administrasyon sang unibersidad sa panawagan nga dugang nga sweldo, benepisyo kag matarong nga kahimtangan sa trabaho. Apat ka bulan na ang pakig-areglo sang mga unyon sa administrasyon sa mando sang NCMB apang nagapabilin nga matig-a kag bungol ini sa ila panawagan.