Pakigbisog sa mga mamumuo sa Wyeth Philippines. Subling nagprotesta ang mga mamumuo sa pagpanguna sa Wyeth Philippines Progressive Workers Union-DFA-KMU atubangan sa planta sa kumpanya sa Cabuyao City, Laguna niadtong Oktubre 24. Gikundena nila ang padayon nga pagdumili sa kapitalista nga tubagon ang ilang panawagan alang sa makatarunganong suhulan ug regularisasyon sa halos upat ka bulan nang negosasyon alang sa collective bargaining agreement (CBA).

Suhulan ug katungod, panawagang tahuron sa Kowloon. Nagpiket ang mga mamumuo sa Kowloon House West gawas sa restawran sa West Avenue, Quezon City sa pangulo sa Kowloon House West Chapter sa Glowhrain-KMU niadtong Oktubre 24. Gikundena sa unyon ang giingon nilang dayag nga pagbalewala sa maneydsment sa katungod sa mga mamumuo ug paglapas sa ilang CBA. Sumala sa unyon, napakyas ang restawran sa pagpatuman sa mga probisyon sa CBA sama sa across-the-board nga pagtaas sa suhulan subay sa mando sa regional wage board ug sa hustong proseso sa mga kaso sa pagdisiplina. Wala usab kini naghatag og angayang benepisyo ug proteksyon.

Duha ka unyon sa UA&P, nangandam magwelga. Nagsumite og taho sa strike vote ang University of Asia and the Pacific (UA&P) Union of Faculty Members ug UA&P Union of Allied Employees sa National Conciliation and Mediation Board (NCMB) niadtong Oktubre 27. Kini ang tubag sa duha ka unyon sa pagdumili sa administrasyon sa unibersidad sa panawagan alang sa dugang sweldo, benepisyo, ug maayong kahimtang sa trabaho. Upat na ka bulan nga nakig-areglo ang mga unyon sa administrasyon sa lebel sa NCMB apan nagmagahi ug nagpabungol-bungol kini sa ilang panawagan.