Pakigbisog han trabahador ha Wyeth Philippines. Utro nga nagprotesta an mga trabahador ha pangunguna han Wyeth Philippines Progressive Workers Union-DFA-KMU ha atubangan han planta han kompaniya ha Cabuyao City, Laguna hadton Oktubre 24. Ginkundena nira an padayon nga pagdiri han kapitalista nga batunon an panawagan nira nga makatadungan nga suhol ngan regularisasyon ha haros upat kabulan na nga negosasyon para ha collective bargaining agreement (CBA).

Suhol ngan katungod, panawagan nga irespeto ha Kowloon. Nagpiket an mga trabahador han Kowloon House West ha gawas han restawran ha West Avenue, Quezon City ha pangunguna han Kowloon House West Chapter han Glowhrain-KMU hadton Oktubre 24. Ginkundena han unyon an gintawag hini nga butaray nga pagbalewaray han maneydsment ha katungod han mga trabahador ngan pagtalapas ha ira CBA. Sigon ha unyon, pakyas an restawran nga igpatuman an mga probisyon han CBA sugad han across-the-board nga umento ha suhol subay ha mando han regional wage board ngan tukma nga proseso ha mga kaso han pagdisiplina. Diri liwat ini nahatag han kaangayan nga benepisyo ngan proteksyon.

2 nga unyon ha UA&P, nangangandam magwelga. Nagsubmiter han report han strike vote an University of Asia and the Pacific (UA&P) Union of Faculty Members ngan UA&P Union of Allied Employees ha National Conciliation and Mediation Board (NCMB) hadton Oktubre 27. Baton ini han duha nga unyon ha pagdiri han administrasyon han unibersidad ha panawagan nga dugang nga sweldo, benepisyo ngan maupay nga kamutangan ha trabaho. Upat kabulan na an pakikig-areglo han mga unyon ha administrasyon ha lebel han NCMB kundi nagpapabilin nga matig-a ngan bungol ini ha ira panawagan.