Natalana nga ilunsar ang isa ka higante nga protesta sang pumuluyo kontra korapsyon sa Luneta Park sa Manila kag iban pa nga bahin sang pungsod sa Nobyembre 30. Pangunahan ang hublag sang bag-o tukod nga Kilusang Bayan Kontra Kurakot (KBKK) nga ginbunga sang protesta sang 100,000 ka indibidwal sa ginatawag Baha sa Luneta sadtong Septyembre 21. Ginapanawagan sang grupo: “Tanan nga imbolbado, dapat pasabton!”

Suno sa KBKK, ang pagpasabat lang sa tanan nga imbolbado sa anomaliya ang magatapos sang sistematiko nga korapsyon nga nagapameste sa pumuluyo. Lakip sa “tanan” si Presidente Marcos nga amo ang naghimo kag nag-aprubar sa tuigan nga badyet nga puno sang anomaliya kag si Vice President Duterte nga nagaatubang sang kaso nga pagwaldas sa ginatos ka milyon nga confidential and intelligence funds.

Sa bug-os nga Nobyembre, kada semana nga ilunsar sang mga kaalyado sang KBKK ang Black Friday Protest, mga piket kag pagpagahod sa mga komunidad, unibersidad, pabrika, merkado kag kon diin man nagatipon ang pumuluyo. Pangunahan man sini ang mga porum, dalagkuan nga mga sinapol kag pagpangtakod sang mga istrimer agud abuton ang mas madamo nga Pilipino.

Sadtong Oktobre, sunod-sunod ang nangin protesta kag mga aktibidad sang mga organisasyon sa idalum sang KBKK. Nagmartsa halin sa Liwasang Bonifacio padulong sa Mendiola sa Manila ang linibo ka mangunguma, kaupod ang iban nga demokratikong sektor sadtong Oktobre 21. Panawagan nila ang matuod nga reporma sa duta kag pagpasabat sa rehimen Marcos sa korapsyon. May yara man sang mga hublag sa Cebu, Bacolod, Davao kag Santiago City sa Isabela, kag sa mga probinsya sang Southern Tagalog kag Panay. Nagsuporta sa mga mangunguma kag naglunsar sang “global nga pagpagahod” ang mga migranteng Pilipino halin sa US,Canada, Australia, United Kingdom, Japan, Hong Kong kag South Korea.

Sadtong Oktobre 24, ginpatigayon ang Black Friday Protest sang Bayan-NCR sa mga syudad sang Manila, Quezon, Pasig, Taguig, kag Valenzuela. May amo man nga aktibidad sa Laguna kag Albay. Ginsulong man sang mga myembro sang Kalikasan-PNE, People Surge kag Kadamay ang compound sa Taguig City kon diin naga-opisina ang ICI.

Sadtong Oktobre 27, nagtipon sa San Juan City ang mga obispo, pari kag pastor halin sa lain-lain nga denominasyon nga nakabase sa National Capital Region para tukuron ang Church People Against Corruption. Pagkasunod nga adlaw, nagprotesta ang mga tsapter sang Gabriela sa Pungsodnon nga Adlaw sang Protesta sang Kababaenhan.

Sadtong Oktobre 30, nagprotesta ang mga mamumugon pang-ikaayong-lawas sa Quezon City agud kondenahon ang korapsyon, kag manawagan sang dugang nga sweldo, pagbayad sa mga benepisyo kag dugang nga tinawo sa mga ospital sang gobyerno. Nag-aksyon man ang mga estudyante sang UP-Tacloban kag University of Eastern Philippines sa Northern Samar.

Sadtong Oktobre 31, liwat nagmartsa ang mga grupo sa idalum sang Bayan sa Mendiola Manila. Ginlunsar man sa adlaw nga ini sang Concerned Artists of the Philippines ang #StopKorap Halloween Party nga may tema nga “Ghost Projects: The Exorcism!” sa Quezon City. May Black Friday Protest man sa Caloocan kag Pasay City, San Pablo City sa Laguna, kag sa Cagayan de Oro City.

Bangkil sang pasismo

Sa atubang sang nagalapad nga kaakig sang pumuluyo, tayuyon ang pagtinguha sang rehimen Marcos nga sumpuon kag kugmaton ang pamatan-on. Sadtong Nobyembre 3, nag-anunsyo ang Philippine National Police-Criminal Investigation and Detection Group (PNP-CIDG) nga nagpasaka ini sang mga kaso sa 97 ka wala ginpangalanan nga indibidwal kaangot sa protesta sadtong Septyembre 21 nga nagdangat sa mapintas nga pagsumpo sang mga pulis.

Dugang sa ila, apat ka lider-estudyante halin sa University of the Philippines-Diliman, Polytechnic University of the Philippines kag De La Salle-College of St. Benilde ang ginpadal-an sang PNP-CIDG sang subpoena agud ipaidalum sa imbestigasyon. Nagpamalibad ang mga lider-pamatan-on nga mag-atubang sa mga pulis. Isa ka protesta man ang ginhiwat nila sadtong Oktobre 27 sa hedkwarters sang PNP sa Quezon City agud batikuson ang mga subpoena.

Magluwas diri, napulo sa mga gin-aresto nga 270 ka indibidwal sadtong Septyembre 21 ang ginrekomendar sang prosekyutor sa Manila nga pormal nga mag-atubang sa kaso nga tumult and other disturbances of public order. Samtang, ginbasura ang mga reklamo nga iligal nga asembliya kag direct assault nga ginpasaka sa mga gin-aresto tungod sa kawad-on sang bastante nga ebidensya.