Nakatakda nga ilunsad ang higanteng protesta sa katawhan batok sa korapsyon sa Luneta Park sa Manila ug uban pang bahin sa nasud sa Nobyembre 30. Manguna dinhi ang bag-ong gitukod nga Kilusang Bayan Kontra Kurakot (KBKK) nga mitumaw gikan sa protesta sa 100,000 ka indibidwal sa gitawag nga Baha sa Luneta niadtong Setyembre 21. Ipapanawagan sa grupo: “Tanang nalambigit, kinahanglang manubag!”

Sumala sa KBKK, pinaagi lamang sa pagpanubag sa tanang nalambigit sa anomalya maundang ang sistematikong korapsyon nga naghasol sa katawhan. Lakip sa “tanan” si Presidente Marcos nga maoy naghimo ug nagaprub sa tinuig nga badyet nga puno sa anomalya, ug si Bise Presidente Duterte nga gipasanginlan sa pag-usik sa gatusang milyon nga confidential and intelligence funds.

Sa tibuok Nobyembre, matag semana ilunsad sa mga sakop sa KBKK ang Black Friday Protest, mga piket ug kalampagan sa mga komunidad, unibersidad, pabrika, merkado, ug bisan asa nga natigom ang katawhan. Manguna usab kini sa mga porum, dagkong mga tigom, ug pagladlad sa mga banderitas aron maabot ang mas daghang Pilipino.

Niadtong Oktubre, sunud-sunod ang mga protesta ug atibidad sa mga organisasyon ubos sa KBKK. Nagmartsa gikan sa Liwasang Bonifacio paingon sa Mendiola sa Manila ang liboan ka mag-uuma, kauban ang ubang demokratikong sektor niadtong Oktubre 21. Ang ilang panawagan mao ang tinuod nga reporma sa yuta ug pagpanubag sa rehimeng Marcos sa kahiwian. Adunay mga protesta usab sa Cebu, Bacolod, Davao, ug Santiago City sa Isabela, ug sa mga prubinsya sa Southern Tagalog ug Panay. Gisuportahan sa mga migranteng Pilipino gikan sa US, Canada, Australia, United Kingdom, Japan, Hong Kong, ug South Korea ang mga mag-uuma pinaagi sa “global kalampagan.”

Niadtong Oktubre 24, gipahigayon ang Black Friday Protest sa Bayan-NCR sa mga syudad sa Manila, Quezon, Pasig, Taguig, ug Valenzuela. Adunay susamang aktibidad sa Laguna ug Albay. Gidagsang usab sa mga myembro sa Kalikasan-PNE, People Surge, ug Kadamay ang compound sa Taguig City diin nag-upisina ang ICI.

Niadtong Oktubre 27, nagtapok sa San Juan City ang mga obispo, pari, ug pastor gikan sa nagkalain-laing denominasyon nga nakabase sa National Capital Region aron tukuron ang Church People Against Corruption. Sa sunod nga adlaw, nagprotesta ang mga balangay sa Gabriela sa Nasudnong Adlaw sa Protesta sa Kababayen-an.

Niadtong Oktubre 30, nagprotesta ang mga mamumuong panglawas sa Quezon City aron makmakon ang korapsyon, ug manawagan og dugang sweldo, pagbayad sa mga benepisyo, ug dugang empleyado sa mga ospital sa gubyerno. Nagprotesta usab ang mga estudyante sa UP-Tacloban ug University of Eastern Philippines sa Northern Samar.

Niadtong Oktubre 31, nagmartsa pag-usab ang mga grupo ubos sa Bayan paingon sa Mendiola sa Manila. Gipahigayon usab niadtong adlawa sa Concerned Artists of the Philippines ang #StopKorap Halloween Party nga may temang “Ghost Projects: The Exorcism!” sa Quezon City. Aduna usay Black Friday Protest sa Caloocan ug Pasay City, San Pablo City sa Laguna, ug sa Cagayan de Oro City.

Pangil sa pasismo

Atubangan sa nagkalapad nga kasuko sa katawhan, padayon ang pagsulay sa rehimeng Marcos nga sumpuon ug hadlukon ang kabatan-onan. Niadtong Nobyembre 3, gianunsyo sa Philippine National Police-Criminal Investigation and Detection Group (PNP-CIDG) nga nagpasaka kini og mga kaso batok sa 97 ka wala nganling indibidwal nga may kalabutan sa protesta niadtong Setyembre 21 nga miresulta sa bangis nga pagpanumpo sa mga pulis.

Dugang kanila, upat ka lider-estudyante gikan sa University of the Philippines-Diliman, Polytechnic University of the Philippines, ug De La Salle-College of St. Benilde ang gipadalhan sa PNP-CIDG og subpoena aron ipailalum sa imbestigasyon. Mibalibad ang mga lider-kabatan-onan nga moatubang sa mga pulis. Usa ka protesta usab ang ilang gipahigayon niadtong Oktubre 27 sa hedkwarters sa PNP sa Quezon City aron batikuson ang mga subpoena.

Gawas niini, napulo sa 270 ka indibidwal nga gipangdakop niadtong Setyembre 21 ang girekomenda sa prosekyutor sa Manila nga pormal nga moatubang sa kasong tumult and other disturbances of public order. Samtang, gibasura ang mga reklamong iligal nga asembliya ug direct assault nga gisang-at sa mga nadakpan tungod sa kakulang sa igong ebidensya.