Nakatalaan nga ilansar an usa nga higante nga protesta han katawhan kontra korapsyon ha Luneta Park ha Manila ngan iba pa nga parte han nasud ha Nobyembre 30. Pangungunahan an paggios han bag-o nga tukod nga Kilusang Bayan Kontra Kurakot (KBKK) nga iginbunga han protesta han 100,000 nga indibidwal ha gintawag nga Baha ha Luneta hadton Septyembre 21. Ipapanawagan han grupo: “Lahat ng sangkot, dapat managot!”

Sigon ha KBKK, ha pagpapabaton gud la ha ngatanan nga dabi ha anomaliya mahuhuman an sistematiko nga korapsyon nga nagpepeste ha katawhan. Kaupod ha “tanan” hi President Marcos nga amo an nagbug-os ngan nag-apruba ha tinuig nga badyet nga putos han anomaliya ngan hi Vice President Duterte nga ginkasuhan ha pagmalgastar han gatos kamilyon nga confidential and intelligence funds.

Ha bug-os nga Nobyembre, sinemana nga iglalansar han mga kaapi han KBKK an Black Friday Protest, mga piket ngan kalampagan ha mga komunidad, unibersidad, pabrika, merkado ngan kun diin nagtitirok an katawhan. Pangungunahan liwat hini an mga porum, dagko nga miting ngan pagsab-ong han mga istrimer agud abuton an mas damo nga Pilipino.

Hadton Oktubre, susrunod an nagin protesta ngan mga aktibidad han mga organisasyon ilarum han KBKK. Nagmartsa tikang Liwasang Bonifacio ngadto ha Mendiola ha Manila an yukut-yukot nga parag-uma, kaupod an iba pa nga demokratiko nga sektor hadton Oktubre 21. Panawagan nira an tinuod nga reporma ha tuna ngan pagpapabaton ha rehimen Marcos ha korapsyon. Nagkamayda liwat han mga paggios ha Cebu, Bacolod, Davao ngan Santiago City ha Isabela, ngan mga prubinsya han Southern Tagalog ngan Panay. Nasuporta ha mga parag-uma ngan naglansar hin “global kalampagan” an mga migrante nga Pilipino tikang ha US, Canada, Australia, United Kingdom, Japan, Hongkong ngan South Korea.

Hadton Oktubre 24 iginlansar an Black Friday Protest han Bayan-NCR ha mga syudad han Manila, Quezon, Pasig, Taguig, ngan Valenzuela. Mayda kapareho nga aktibidad ha Laguna ngan Albay. Ginprotestahan naman han mga membro han Kalikasan-PNE, Peoples Surge ngan Kadamay an compound ha Taguig City diin nag-uupisina an ICI.

Hadton Oktubre 27, nagtirok ha San Juan City an mga obispo, padi ngan pastor tikang ha magkalain-lain nga denominasyon nga nakabase ha National Capital Region agud tukuron an Church Peope Against Corruption. Kinabuwasan, nagprotesta an mga tsapter han Gabriela ha Nasyunal nga Adlaw han Protesta han Kababayin-an.

Hadton Oktubre 30, nagprotesta an mga trabahador pankalibsugan ha Quezon City agud kundenahon an korapsyon, ngan manawagan han dugang nga sweldo, pagbayad ha mga benepisyo ngan kadugangan nga tawuhan ha mga ospital han gubyerno. Gumios gihap an mga estudyante ha UP-Tacloban ngan University of Eastern Philippines ha Norther Samar.

Hadton Oktubre 31, utro nga nagmartsa an mga grupo ilarum han Bayan ha Mendiola ha Manila. Iginlansar liwat hiton nga adlaw han Concerned Artists of the Philippines an #StopKorap Halloween Party nga may tema nga “Ghost Projects: The Exorcism!” ha Quezon City. Nagkamayda gihap han Black Friday Protest ha Caloocan ngan Pasay City, San Pablo City ha Laguna, ngan ha Cagayan de Oro City.

Tango han pasismo

Ha atubangan han natikahiluag nga kangalas han katawhan, dirudiretso an pag-atentar han rehimen Marcos nga pugngan ngan tarhugon an kabatan-unan. Hadton Nobyembre 3, nag-anunsyo an Philippine National Police-Criminal Investigation and Detention Group (PNP-CIDG) nga nagsalawad ini han mga kaso ha 97 nga waray ngarani nga indibidwal kasumpay han protesta hadton Septyembre 21 nga nahingadto ha madarahug nga pagpuypoy han mga pulis.

Dugang ha ira, upat nga lider-estudyante tikang ha University of the Philippines-Diliman, Polytechnic University of the Philippines ngan De La Salle-College of St. Benilde an ginpadad-an han PNP-CIDG han subpoena agud igpailarum ha imbestigasyon. Diniri an mga lider-kabatan-unan nga umatubang ha mga pulis. Usa nga protesta liwat an iginlansar nira hadton Oktubre 27 ha hedkwarters han PNP ha Quezon City agud suknaon an mga subpoena.

Labot hini, napulo ha mga gin-aresto nga 270 nga indibidwal hadton Septyembre 21 an iginrekomenda han prosekyutor ha Manila nga pormal nga umatubang ha kaso nga tumult and other disturbances of public order. Samtang, iginbasura an mga reklamo nga iligal nga asembleya ngan direct assault nga iginsalawad ha mga gin-aresto tungod ha kawaray hin sadang nga ebidensya.