Niadtong Oktubre 31, gianunsyo ni Pete Hegseth, kalihim sa Department of War sa US (kanhing Department of Defense), ang pagtukod sa US sa “Task Force Philippines” atol sa pulong sa ASEAN Defense Ministers’ Meeting (ADMM)-Plus sa Malaysia. Ang task force gilangkuban og 60 ka elemento gikan sa US Pacific Fleet ug pangulohan sa usa ka heneral nga Amerikano. Kini pagpalapad sa mga operasyon sa US Task Force Ayungin nga nakabase sa Palawan ug karon nagdirihe sa pakigdutdut sa Pilipinas sa mga barkong Chinese sa mga giilugang isla ug bahura.

Gipahibalo ni Hegseth ang Task Force Philippines human wala nauyonan sa ASEAN ang iyang sugyot nga pagtukod og “shared maritime domain awareness program” aron isentro sa US ang mga datos-paniktik batok sa China. Wala midapig ang mga nasud sa sugyot bisan pa sa tanyag niyang abanteng teknolohiyang drone sama sa mga unmanned nga sakyanang pangkahanginan ug pangdagat isip baylo sa kooperasyon.

Usa na lamang ka “Indo-Pacific Chiefs of Defense Cooperation Council” ang gitukod ni Hegseth, kauban ang itoy niining si Gilbert Teodoro, ug mga kalihim sa depensa sa Australia ug Japan sa ilang miting sa Malaysia niadtong Nobyembre 1. Walay bag-o sa maong konseho tungod kay ang upat ka nasud aduna nay mga “kooperasyon” pinaagi sa bilateral, trilateral, ug multilateral nga mga kasabutang militar.

Tigwarawara sa imperyalistang adyenda

Sa wala pa ang anunsyo, nagpadayag og kabalaka ang mga silingang nasud sa Pilipinas sa pamulong ni Ferdinand Marcos Jr sa ASEAN niadtong Oktubre 28 diin nanawagan siya alang sa “enhanced defense cooperation” uban sa Japan ug US batok sa giingong “seryosong hulga sa agresyon sa China” sa rehiyon.

Gipahimangnoan sa prime minister sa Malaysia nga si Anwar Ibrahim nga “dili magpadala sa mga eksternal nga pwersa” aron masulbad ang internal nga mga panaglalis. Matud ni Ibrahim, angay nga likayan ang pagpamugos ug kagubot alang sa istabilidad sa rehiyon. Giawhag niya ang mga nasud nga ipaagi sa dayalogo, kooperasyon, ug malinawong pamaagi ang pagsulbad sa mga isyu subay sa mga prinsipyo sa ASEAN. Nagpadayag usab og kabalaka ang Indonesia, Laos, ug Cambodia sa labaw pang pag-init sa tensyon sa kadagatan tungod sa agresibong pagpanghagit ni Marcos sa China.

Bag-o lang, gipanghinambog pa sa kumander sa AFP nga si Romeo Brawner ang kapabilidad sa Typhon Missile System nga “abton ang China.” Ang maong sistema sa misayl gibutang sa amihanang bahin sa Luzon, duul sa Taiwan. Mahimong isipon kini nga opensibang postura ug kabahin sa interbensyon sa US sa internal nga mga isyu sa Taiwan ug China.

Base sa imperyalistang makinarya sa gubat

Ang Pilipinas, pinaagi sa lunod-patay nga tutang estado niini, ang bugtong nasud sa Southeast Asia nga nagtugot sa dinugay nga pagbase sa mga langyawng tropa ug ilang mga armas sa kayutaan ug kadagatan niini. Kini lamang usab ang adunay pormal nga mga kasabutang militar sa US sama sa Mutual Defense Treaty ug Enhanced Defense Cooperation Agreement sa rehiyon. Timaan sa hingpit nga pagkaitoy niini, gitukod sa AFP ang Strategic Command aron hugpungon ang lain-laing sanga niini aron mas mapadali ang dagan sa mando sa US.

Sa sunod nga mga bulan, dili na lang mga tropang Amerikano ang pagatugutan sa rehimeng Marcos nga magbase sa Pilipinas. Anaa na sa negosasyon ang pagtukod sa Japan ug Australia, mga mayor nga kaalyado sa US, sa ilang kaugalingong mga base ug bodega sa nasud. Dugang sa US, upat na ka nasud ang gitugutan nga magsulod-gawas og tropa, gamit, ug sakyanan subay sa gipirmahan nga mga visiting forces agreement (VFA). Ang pinakabag-o niini mao ang VFA uban sa Canada nga gipirmahan niadtong Nobyembre 2.

Walay hunong ug nagpulihinay ang presensya sa mga langyawng tropa sa nasud pinaagi sa walay katapusang war games, multilateral maritime exercise, “pag-inambitay” sa kasinatian, ug mga operasyong sibil-militar. Gigamit nila bisan ang sunud-sunod nga mga katalagman nga nasinati sa mga Pilipino, sama sa linog ug lunop, aron himuong “normal” sa katawhan ang ilang presensya ug interbensyon sa internal nga mga isyu sa nasud.