Sadtong Oktobre 31, gin-anunsyo ni Pete Hegseth, tiglikom sang Department of War sang US (sadto Department of Defense) ang pagtukod sang US sang “Task Force Philippines” sa sinapol sang ASEAN Defense Ministers’ Meeting (ADMM)-Plus sa Malaysia. Bug-oson ang task force nga ini sang 60 ka elemento halin sa US Pacific Fleet kag pamunuan sang isa ka Amerikano nga heneral. Pagpalapad ini sa mga operasyon sang US Task Force Ayungin nga nakabase sa Palawan kag subong nagadiriher sa pakig-gasgasan sang Pilipinas sa mga barko nga Chinese sa gina-awayan nga mga isla kag reef (balas kag bato sa higad baybay).

Ginsapubliko ni Hegseth ang Task Force Philippines pagkatapos nga wala nagpasugot ang ASEAN sa gin-proponer niya nga pagtukod sang isa ka “shared maritime domain awareness program” para isentro sa US ang mga datos-paniktik batuk sa China. Wala nagkagat ang mga pungsod sa ginproponer sa pihak sang pagtanyag niya sang abanse nga tekonolohiya nga drone kaangay sang mga unmanned (wala sang piloto) nga mga salakyan pangkahawaan kag pangdagat kabaylo sang kooperasyon.

Isa na lang ka “Indo-Pacific Chiefs of Defense Cooperation Council” ang gintukod ni Hegseth, kaupod ang nagasunod-sunod nga ido-ido sini nga si Gilbert Teodoro, kag ang tiglikom sa depensa sang Australia kag Japan sa pagsinapol nila sa Malaysia sadtong Nobyembre 1. Wala sang bag-o sa konseho nga ini tungod ang apat ka pungsod may sampaw-sampaw nga “kooperasyon” sa dagway sang mga bilateral, trilateral kag multilateral nga kasugtanan militar.

Tigbandera sang imperyalistang adyenda

Antes ang anunsyo, nagpahayag sang pagkabalaka ang mga kaiping nga pungsod sang Pilipinas sa pamulong-pulong ni Ferdinand Marcos Jr sa ASEAN sadtong Oktobre 28 kon diin nagpanawagan siya para sa “enhanced defense cooperation” kaupod ang Japan kag US batuk sa “seryoso nga peligro sang agresyon sang China” sa rehiyon.

Paandam sang prime minister sang Malaysia nga si Anwar Ibrahim, “indi magpadala sa mga eksternal nga pwersa” para solbaron ang internal nga mga konplikto. Suno kay Ibrahim, dapat nga pareho nga likawan ang pagpamilit kag pagpanggamo para sa istabilidad sang rehiyon. Gina-engganyo niya ang mga pungsod nga iagi sa dayalogo, kooperasyon kag malinong nga pamaagi ang pagresolbar sa mga hambalanon sandig sa mga prinsipyo sang ASEAN. Nagpahayag sang pagkabalaka ang Indonesia, Laos kag Cambodia sa labi pa nga pag-init sang tensyon sa kadagatan tungod sa agresibo nga pagpanghangkat ni Marcos sa China.

Sang sini lang, ginatikal pa sang kumander sang AFP nga si Romeo Brawner ang ikasarang sang Typhon Missile System nga “malab-ot ang China.” Natambak ang amo nga sistema sang misayl sa norte nga bahin sang Luzon, malapit sa Taiwan. Makabig ini nga opensiba nga pagpostura kag kabahin sang pagpasilabot sang US sa internal nga hambalanon sang Taiwan kag China.

Base sang imperyalistang makinarya sa gyera

Ang Pilipinas, paagi sa bat-ulan nga ido-ido nga estado sini, ang solo nga pungsod sa Southeast Asia nga nagapahanugot sang malawigon nga pagbase sang mga dumuluong nga tropa kag ila mga armas sa kadutaan kag kadagatan sini. Amo man lang ini ang may pormal nga mga kasugtanan militar sa US nga kaangay sang Mutual Defense Treaty kag Enhanced Defense Cooperation Agreement sa rehiyon. Pamatuod sang bat-ulan nga pagpaido-ido sini, gintukod sang AFP ang Strategic Command agud hiusahon ang lain-lain nga sanga sini para labi pa nga pahulason ang ilig sang kumand sang US sa sulod sini.

Sa masunod nga mga binulan, indi lang tropa nga Amerikano ang pahanugutan sang rehimen Marcos nga magbase sa Pilipinas. Yara sa negosasyon na ang pagpatindog sang Japan kag Australia, mga mayor nga alyado sang US, sang kaugalingon sini nga mga base kag tambakan sa pungsod. Dugang sa US, apat ka pungsod ang ginpahanugutan nga magpaguwa-pasulod sang mga tropa, gamit kag salakyan santo sa ginhimo nga visiting forces agreement (VFA). Pinakaulihi diri ang VFA kaupod ang Canada nga ginpirmahan sadto lang Nobyembre 2.

Wala-untat kag nagabulos-bulos ang presensya sang mga dumuluong nga tropa sa pungsod sa dagway sang wala katapusan nga war games, multilateral maritime exercise,”pagpaambitanay” sang inagihan kag mga operasyon sibil-militar. Ginagamit sang mga ini bisan ang asod-asod nga mga kalamidad nga naagihan sang mga Pilipino, kaangay sang linog kag baha, para himuon nga “normal” sa pumuluyo ang ila presensya kag pagpasilabot sa internal nga mga hambalanon sa pungsod.