Naglunsad og operasyong haras ang Bagong Hukbong Bayan (BHB)-South Central Negros (Romeo Nanta Command) batok sa mga tropa sa 94th IB sa Sityo Cantupa, Barangay Buenavista, Himamaylan City, Negros Occidental niadtong Oktubre 27 sa gabii. Dili momenos sa duha ka mga berdugong sundalo ang naangol.

Misutoy pagdagan ang mga sundalo ug pipila ka segundo pa ayha makabalos og buto. Paturagas nga nangrakrak ang 94th IB gamit ang ilang mga masinggan ug nagpabusikad og M203.

Samtang, nataho sa BHB-Southwest Negros (Armando Sumayang Jr Command) ang pagsurender sa pipila ka ahenteng intel sa 15th IB sa lungsod sa Cauayan sa Oktubre. Gidawat sa yunit ang pagsurrender sa mga ahente sa rason nga wala pa silay gibungang kadaut ug utang nga dugo sa rebolusyonaryong kalihukan ug sa katawhan.