Usa ka bulan na nga gitugaw sa 12th Civil Military Operation (CMO) Battalion ug NTF-Elcac ang mga residente sa North Caloocan. Sagunson ang ilang gibuhat nga Red-tagging, pagpaniktik, ug pagpamig-ot ilabina sa mga myembro sa progresibong organisasyon sa mga barangay.

Una nga gideploy ang batalyon sa Barangay 181-182, Pangarap Village niadtong Oktubre 3 sa takuban sa Community Support Program. Plano sa militar nga sumpuon ang pagsukol sa katawhan nga nag-atubang sa hulga sa demolisyon gikan sa pamilyang Araneta.

Nagsugod og kampo ang 12th CMO sa pagpanguna ni 2nd Lt. Julie San Jose sa likod sa covered court sa Barangay 175, Camarin niadtong Oktubre 6, sa takuban sa kalinaw ug kalig-on. Dinhi na nagpokus ang operasyon sa batalyon. Paglabay sa pipila ka adlaw, gisakop sa ilang operasyon ang Barangay 187-188 Tala.

Niadtong Oktubre 28, gisulod ang upisina sa Gabriela-Caloocan sa mga nagpailang mga pulis. Nagdeklara silang adunay dalang warrant of arrest apan walay gipakita nga dokumento. Sa samang adlaw, gipatawag sa militar ug kapitan sa barangay ang mga myembro sa Gabriela-Matarik sa barangay hall diin gipasanginlan sila nga mga rekruter sa rebolusyonaryong organisasyon.

Gigamit usab sa NTF-Elcac ang asembliya sa barangay niadtong Oktubre 18 aron ipakaylap ang sayop nga impormasyon ug i-red-tag ang mga organisasyong masa. Dayag ang pagpaniktik sa militar sa mga protesta batok sa korapsyon sa mga progresibong grupo, nga gilunsad sa Camarin Kiko Palengke ug sa UCC Congressional Village niadtong Oktubre 10 ug 17.

Nabalaka ang Defend Caloocan nga usbon sa militar ang pagpugos sa mga myembro sa progresibong grupo ug mga residente nga “magbalik-loob” sama sa gibuhat sa 12th CMO sa United Vendors Alliance niadtong 2024.

Ang militarisasyon nga nahitabo sa North Caloocan nahiuyon sa gambalay sa National Action Plan for Unity, Peace and Development. Sumala sa programang Capacitating Urban Communities for Peace and Development nga gipangulohan sa Department of the Interior and Local Government, gipailalum ang mga komunidad sa kasyudaran nga adunay natukod nga makinasudnong organisasyon sa mga operasyong sarbeylans, pagpamig-ot, ug pagpanumpo sa PNP ug AFP.