Matngon ug militanteng gipakyas sa mga kabatan-onan ug estudyante ang sulayng interbensyon sa National Task Force-Elcac ug mga bayarang traydor sa rebolusyonaryong kalihukan sa mga unibersidad sa takuban sa mga “porum” ug “akademikong diskusyon.”

Sa UP Mindanao, nag-walkout ang mga lider-estudyante sa kampus atol sa porum sa TAGBO 2025 niadtong Oktubre 26 tungod sa pagsal-ot ug pagpamulong ni Arian Ramos, usa ka traydor sa rebolusyonaryong kalihukan ug usa sa lunod-patay nga tigdepensa sa NTF-Elcac ug Armed Forces of the Philippines. Si Ramos, uban sa napulo ka sama niyang traydor, mao ang nanguna sa Red-tagging sa lehitimong mga organisasyong estudyante ug ilang mga lider. Nagdala pa si Ramos og “bodyguard” nga ahenteng paniktik nga nagbunga og grabeng kabalaka sa mga estudyante.

Gipasidunggan sa Council of Student Leaders sa unibersidad ang gibuhat nga pag-walkout sa mga estudyante. Gikundena usab nila ang administrasyon sa UP Mindanao nga mitugot niining mahitabo nga matud pa nila dili usa ka “isolated” nga insidente. Dugang nila, kini salamin sa mga “kahuyangan sa institusyon” nga kaniadto pa nila gikundena. Kapin 30 ka organisasyong pang-estudyante sa UP Mindanao ang mipirma sa pamahayag sa CSL.

Sa UST, napaatras sa kolektibong pagkundena sa mga estudyante ang partisipasyon unta sa NTF-Elcac sa porum nga “Preventing Terror Grooming: The Philippine Experience.” Sumala sa mga progresibong grupo sa kampus, ang pag-imbitar sa ahensya usa ka pagyatak sa dungog sa unibersidad ug sa mga Tomasinong nagdepensa sa kamatuuran.

Niadtong Nobyembre 5, naglunsad og protesta ang mga estudyante sa kampus isip pagrehistro sa ilang pagbatikos sa NTF-Elcac ug sa porum. Bisan napaatras ang NTF-Elcac, nagsilbi gihapon isip dinapit ug tigpamaba sa porum niadtong Nobyembre 6 ang representante sa National Security Council ug ang traydor nga si Arian Ramos. Nakigdebate kanila ug mibarog batok sa Red-tagging ang usa ka aktibista sa UST.