Sa milabayng mga semana, sunud-sunod ang mga taho sa makaluluoy nga kahimtang sa mga migranteng Pilipino nga bangis nga gilutos, giabuso, gideport, ug gihikawan sa hustisya ug mga katungod. Sa nagkagrabeng krisis sa ekonomiya sa kalibutan, sila ang gipasanginlan sa pag-ilog sa trabaho, sa implasyon, ug sa pagtaas sa mga krimen sa mga nasud diin sila nahimutang.

Sa Canada, Japan, ug Korea, labaw pang migrabe ang paglutos sa mga imigrante tungod sa mga palisiyang kontra-migrante ug nagkagrabeng kultura sa rasismo ug xenophobia.

Sa Taiwan, mikabat sa 169 ang narekord nga biktima sa pagpanglugos sa han-ay sa mga migranteng mamumuo sa nasud sa miaging tuig. 22 sa mga biktima mga Pilipino. Kadaghanan sa mga biktima nagatrabaho sa mga pabrika ug isip mga katabang sa balay.

Sa US, 143 ka Pilipinong marino ang gideport gikan sa miaging tuig. Niadtong Setyembre, gikansela sa embahada sa US sa Pilipinas ang mga aprobadong US visa sa mga marino nga pagawas pa lang unta sa nasud. Sama sa mga gideport nga marino, gigamit sa embahada ang pasangil nga kasong child pornography bisan walay ebidensya o imbestigasyong gihimo.

Sa Thailand, kapin sa usa ka gatus ka Pilipinong biktima sa “scam-hub trafficking” ang nakaabot na sa utlanan sa Myanmar ug nanginahanglan og hinanaling tabang ug aksyon.

Sa Kuwait, hilaw nga hustisya ang nakuha sa pamilya ni Dafnie Nacalaban, usa ka katabang sa balay nga gipatay sa iyang amo. Anaa lamang sa 14 ka tuig nga pagkabilanggo ang gipahamtang sa maong amo, nga ubos kaayo nga sentensya alang sa iyang krimen.

Sa The Netherlands, gihikaw usab ang hustisya sa 11 ka migranteng mamumuong Pilipino sa desisyon sa Public Prosecution Service nga ibasura ang ilang reklamong human trafficking batok sa Saints and Stars Gym nga nakabase sa Amsterdam.

Ang makaluluoy nga kahimtang sa mga migrante direktang resulta sa labor export policy sa reaksyunaryong gubyernong Pilipino. Gisuportahan niini nga mga palisiya ang migrasyon sa mga mamumuong Pilipino imbis nga sulbaron ang problema sa kawalay trabaho, makabuhi suhulan, ug disenteng katilingbanong serbisyo.