Gikan Enero hangtud Oktubre karong tuiga, dili momenos sa 99 ka barangay ug 15 ka munisipalidad sa isla sa Leyte ang gigun-ob sa mga operasyong kombat sa 802nd IB. Kauban niini sa operasyon ang 14th IB, 93rd IB, 8th CMO Battalion, ug pulis.

Sa prubinsya sa Leyte, 10 ka lungsod ang nasakop sa operasyong kombat, lakip ang Baybay City, nga niadtong Pebrero giklasipikar nga Stable Internal Peace and Security Condition (SIPSC) aron ipagawas nga wala nay pwersa ang hukbong bayan sa maong lugar. Niadtong Setyembre, gipailalum sa hamlet ang Barangay Caraye sa Javier, ug mga barangay Igang ug Hilapnitan sa Baybay City.

Sa Southern Leyte, lima ka lungsod ang militarisado, lakip ang Saint Bernard nga giklasipikar usab nga SIPSC niadtong Marso.

Sumala sa mga residente, kada anaa ang militar sa baryo, padayon ang ilang pagpanghadlok. Pugos silang ginapapauli og sayo gikan sa ilang umahan. Gihulga sila nga dakpon ug prisuhon kung maghatag og tabang sa hukbo. Gipasurender usab sa militar ang mga pusil nga ginagamit sa mga residente sa pagpangayam.

Usa sa pinakabag-o nga krimen sa militar sa isla mao ang pagdakop sa mag-uuma nga si “Loloy” nga taga Barangay Masuganao, Mahaplag, Leyte. Gipasanginlan siyang sakop sa Bagong Hukbong Bayan.