Mahukmanong gipatigbabawan sa Katipunan ng mga Gurong Makabayan (Kaguma) ang mga kahuyangan ug kasaypanan niini sa milabayng mga tuig, sa inspirasyon sa kalihukang pagtul-id sa rebolusyonaryong kalihukan. Pamatuod niini ang pagpahigayon sa rebolusyonaryong grupo sa mga magtutudlo sa ilang Ika-upat nga Nasudnong Kongreso niadtong Oktubre.

Nagtapok ang dili momenos sa 79 ka myembro sa mga balangay sa Kaguma gikan sa lain-laing rehiyon, akademikong institusyon, ug unibersidad sa sektor sa edukasyon alang sa kongreso. Nagkahiusa ang mga delegado sa temang “Asdang rebolusyonaryong kalihukang magtutudlo! Magtul-in! Magpalapad! Makigbisog! Magmadaugon! Determinadong iasdang ang demokratikong rebolusyon sa katawhan nga adunay sosyalistang perspektiba!”

Kapin duha ka dekada na ang milabay sukad sa ulahing kongreso sa grupo. Ang mga una niining kongreso gipahigayon niadtong 1985, 1987, ug 2003. Gitukod ang grupo niadtong Marso 28, 1971.

“Subling ipabarog ang Kaguma, mapangahasong magpalapad ug magpalig-on sa tibuok nasud. Subsub nga iasdang ang mga kumprehensibong katungdanan alang sa rebolusyon,” matud sa Nasudnong Kalihiman report niini sa pagsugod sa kongreso.

Sa maong tigum, gireport sa kalihiman ang pagsumada sa Kaguma sa kaugalingong organisasyon sa milabayng duha ka dekada. Gipakita niini ang mapainubsanong pagsaway sa kaugalingon sa pagbiya sa batakang prinsipyo sa rebolusyonaryong organisasyon ug sa mga pamaagi niini sa milabayng mga tuig.

Napinal ug nauyunan sa kongreso ang mahinungdanong mga dokumento sa Kaguma, lakip ang oryentasyon, batakang balaod, ug ang tulo ka tuig nga taktikal nga plano niini. Gigambalay sa kongreso ang unum ka resolusyon nga mogiya sa padayon nga pag-uswag sa organisasyon.

Gipili usab sa kongreso ang bag-ong Nasudnong Konseho ug Nasudnong Komiteng Tigpatuman nga mao ang mangulo sa organisasyon sa tibuok nasud. Si Guia Umili napili isip tsirman ug tigpamaba sa Kaguma.

Gitimbaya sa National Democratic Front of the Philippines ug sa Partido Komunista ng Pilipinas ang determinasyon ug kapursigido sa Kaguma sa pagpahigayon sa Ika-upat nga Nasudnong Kongreso niini.

“Naglaum kami nga niining kongreso makonsolida ninyo ang inyong han-ay, makakuha og mga leksyon gikan sa mga kasinatian, ug mas lig-on nga moabante sa pagtuman sa mga katungdanan sa pagpalig-on sa rebolusyonaryong han-ay sa mga magtutudlo,” matud ni Elias Dipasupil, kinatibuk-ang kalihim sa NDFP.

Sumala kang Marco Valbuena, nangulong upisyal sa impormasyon sa PKP, dili malimud nga makasaysayanon ang gilunsad nga kongreso, dili lamang tungod kay napahigayon kini human sa taas nga panahon, kundili tungod kay sigurado nga kini mao ang sinugdanan sa bag-ong panahon sa pag-uswag sa mas taas nga ang-ang sa rebolusyonaryong kalihukang magtutudlo.

Matod ni Valbuena, ang Kaguma nagsilbing sulo alang sa mga magtutudlo nga naghatag og kahayag sa dalan nga kinahanglan nilang baktason aron makab-ot ang ilang mga tinguha ug sa tibuok katawhan. “Sa inyong pagpaningkamot, gihatagan ninyo og inspirasyon ang mga magtutudlo aron motan-aw lapas sa kasamtangang mga kalisdanan, ug mosalmot sa pakigbisog sa mas lapad nga katawhan aron hingpit nga mabag-o ang kahimtang sa katilingban,” mensahe niya sa Kaguma.

Sa paghuman sa kongreso, dungan-dungan nga nanumpa pag-usab ang mga myembro ug mga bag-ong napili ng mangulo, gisundan sa panak-op nga pamahayag sa tsirman. Sa iyang pamulong, giila ug gipasidunggan ang mga martir sa sektor ug sa katawhan. “Silang naghalad ug nagbuhis sa tibuok kinabuhi alang sa rebolusyon. Pasidunggan nato ang mga kauban nato sa kabanikanhan, nga mipatuman sa taas nga matang sa pakigbisog,” matud niya.

Hagit ni Umili sa mga delegado: “Hinaot nga padayon nga molig-on ang panaglambigitay sa atong rebolusyonaryong teorya ug praktika; hinaot nga ang mga dokumento ug pagtuon dili mahimong nagpondong kahibalo nga natago lamang sa atong mga hunahuna kundili mahimong giya sa pagpalambo sa atong paglihok; ug ang atong paglihok iabante ngadto sa mas taas nga ang-ang sa atong rebolusyonaryong teorya.”