Kinahanglan nga kusganong makmakon ug batukan ang gitukod nga Task Force Philippines sa imperyalistang US nga pagagamiton niini alang sa dugang nga interbensyong militar sa nasud. Sa pagtukod sa Task Force Philippines, labawng dayag nga gikontrol sa US ang Armed Forces of the Philippines (AFP) ug uban pang pwersa sa seguridad sa neokolonyal nga estado aron magsilbi sa heyopulitikal nga interes sa US sa Asia.

Ang Task Force Philippines usa ka bag-ong yunit militar sa US nga nakabase sa Pilipinas. Ang tumong niini mao ang pagtakda sa direksyon, plano, ug operasyon sa AFP sa “depensang panggawas” gikan sa South China Sea hangtud sa Luzon Strait, batok sa giingong “pugsanon ug agresibo” nga lihok sa China sa kadagatan.

Dakung kabuang ang deklaradong tumong niini nga “pagpalig-on sa kooperasyon tali sa US ug Pilipinas.” Kataw-anan nga giangkon mismo sa hepe sa AFP nga wala siya’y nahibal-an nga detalye mahitungod niining planong task force sa US. Ang iyang nahibal-an lamang mao nga kini gibase sa konsepto ug operasyon sa Task Force Ayungin nga gitukod sa US sa miaging tuig.

Gitukod ang naunang task force kaniadtong 2024 ug gilangkuban sa mga upisyal militar sa US. Kini ang nagplano sa mga operasyong “resupply” sa AFP sa barkong BRP Sierra Madre nga nahimutang sa Ayungin Shoal. Gipadala sa US ang mga himang militar ug armas niini, ug gisuportahan sa ilang sarbeylans sa kahanginan ug kawanangan (satellite). Sa laktud, ang mga “resupply mission” sa AFP mga operasyon sa kadagatan nga direktang mando ug kontrol sa US.

Ang pagtukod sa Task Force Philippines mao ang pinakabag-ong pakana sa imperyalistang US ug usa ka klarong timailhan sa mas taas nga ang-ang sa interbensyon. Kini nagsilbi sa gambalay sa Indo-Pacific Strategy sa US aron palibutan ang imperyalistang karibal niini nga China, ug pugngan ang nagkadakung gahum niini sa militar ug ekonomiya.

Daghan nang tuig nga ginagamit ug ginasugnuran sa US ang panagbangi sa kadagatan tali sa Pilipinas ug China aron hatagag rason ang paggamit sa Mutual Defense Treaty ug uban pang mga dili patas nga kasabutang militar aron palig-onon ang presensya sa mga pwersang militar niini sa Pilipinas. Gitukod niini ang labing menos siyam ka base militar sa US nga giila ubos sa Enhanced Defense Cooperation Agreement (EDCA).

Daghan pa ang wala giangkong base ug pasilidad sa US sa nagkalain-laing bahin sa nasud, lakip ang gitukod nga pasilidad sa AFP sa Mavulis Island sa Batanes aron magamit sa US. Adunay presensya usab ang militar sa US sa mga pasilidad sa Ilocos Norte, Aurora, Quezon, Mindoro, Panay, ug nagkalain-laing bahin sa Palawan. Kini nga mga pasilidad gidumalahan sa mga upisyal ug sundalong Amerikano o gipahimutangan og mga armas sama sa Typhon missile system ug uban pang magun-ubong mga armas. Plano usab sa US nga tukuron sa nasud ang mga pabrika sa bala, drone, ug uban pang armas. Dugang pa, adunay plano ang US nga magtukod og refueling depot sa lapad nga kadagatan sa Davao Gulf.

Permanente usab ang presensya sa mga barkong iggugubat sa US sa kadagatan sa Pilipinas, lakip ang mga higanten aircraft carrier nga nagsakay og liboan ka sundalong Amerikano. Libre silang nagalawig ug nagadunggo sa bisan asang bahin sa Pilipinas. Gigamit kini sa sunud-sunod ug patung-patong nga mga war games sa Pilipinas, nga pulos nakapokus sa senaryo sa pag-ulbo sa gubat batok sa China.

Lunod-patay nga itoy si Marcos sa iyang amo nga imperyalistang US. Labaw pa siyang nahimong itoy tungod sa desperasyong makuha ang suporta sa US, taliwala sa nagkakusog nga krisis sa pulitika tungod sa nabutyag nga dakung mga kaso sa korapsyon ug nagpadayon nga lapad nga mga protesta batok sa iyang rehimen.

Sa bag-o lang nga miting sa ASEAN, si Marcos ang nagsilbing tigdala sa adyenda sa US, ug gipugos ang giingong “enhanced defense cooperation” sa mga nasud sa Southeast Asia batok sa “hulga ug agresyon” sa China. Napalaw si Marcos kay wala bisan usa nga misuporta sa iyang sugyot.

Subay sa mando sa US, sunud-sunod nga gisulod ni Marcos ang mga kasabutang “visiting forces” sa Japan ug Canada, mga nasud nga kaalyado sa militar sa US. Ang tumong niini mao ang pagtugot nga gamiton sa maong mga nasud ang teritoryo sa kadagatan ug kayutaan sa Pilipinas alang sa mga operasyong militar nga kaalyado sa US. Karon, gipasigarbo pa ni Marcos nga mopalit siya og mga himang iggugubat gikan sa US aron kunuhay makasukol og usa ka bulan ayha mangayo og tabang sa laing nasud.

Subay sa adyenda ni Marcos, ang nagkalain-laing maka-US nga partido, organisasyon, institusyon, ug mga bahin sa masmidya naglihok aron suportahan ang nagkadakung presensya militar sa US sa Pilipinas, ubos sa tabil nga pagdepensa sa “West Philippine Sea.” Kining tanan gipondohan sa imperyalismong US pinaagi sa mga institusyon sama sa National Endowment for Democracy ug midagayday sa mga grupo sama sa “INCITEgov.” Niadtong 2023, naghatag ang gubyerno sa US og $1.6 bilyon alang sa 5-tuig nga programa sa “propagandang kontra-China.”

Ginapaypayan nila ang Sinophobia o ang pagdumot sa tanang may kalabutan sa China. Sama kang Marcos, gipahayag nila nga adunay hulga sa “pagpanakop” ug “agresyon” gikan sa China, apan hilum kung giunsa ang Pilipinas nagpabiling neokolonya sa imperyalismong US. Ginapagawas nila nga “maka-China” ang bisan kinsang mosupak sa mga interbensyong militar sa US sa Pilipinas.

Nagpakaaron-ingnon karon ang mga Duterte nga anti-US aron tabunan ang isyu sa korapsyon diin nalambigit ang ilang pamilya. Walay pulos kini nga postura. Dihang anaa siya sa poder, wala gibuhat si Rodrigo Duterte aron sirad-an ang mga EDCA site ug hingpit nga ibasura ang VFA ug uban pang kasabutang militar sa US. Gipabuhian niya ang sundalong Amerikano nga mipatay kang Jennifer Laude. Hilum karon ang mga Duterte sa plano sa US nga magtukod og refueling depot sa Davao Gulf.

Taliwala sa nagkakusog nga pagduso sa US sa pagpanghagit og gubat ug pag-among o paggamit sa Pilipinas batok sa China, daku ang panginahanglan nga magkahiusa ang katawhan aron molihok sa pagsupak ug pagbatok niini.

Kinahanglang pakusgon ang singgit sa katawhan aron bungkagon ang tanang base militar sa US, tangtangon ang tanang misayl sa US sa mga sekretong lokasyon sa Pilipinas, ug papahawaon ang mga pwersang militar sa US sa nasud. Kinahanglan isumpay kini sa pakigbisog sa katawhan aron makalingkawas sa mga kuko sa imperyalistang mangdadagit, makab-ot ang kaugalingnan, ug matukod ang nasud nga gawasnon ug mauswagon.