Padayon nga ginatarget sa militar ug pulis ang mga mag-uuma sa isla sa Panay ug Negros sa milabayng mga semana aron hadlukon ang mga komunidad ug magsabwang og terorismo.

Sa Negros Occidental, gipatay sa militar ang babayeng mag-uuma nga si Joan Escuadro niadtong gabii sa Nobyembre 3. Gisulod sa mga ahente sa militar ang iyang balay ug gidul-itan pagpusil.

Sa Bago City, padayon ang pagpamig-ot sa pulis sa Negros Occidental District Jail-Male Dormitory sa mga bilanggong pulitikal ug lider nga mibatok sa pagpangabuso sa napalagpot apan nakabalik ra sa poder nga si warden Maj. Crisysrel Awe. Arbitraryong gibartolina si Lorenzo Perolino sukad niadtong hapon sa Oktubre 26.

Sa Iloilo City, gidakop sa mga pulis ang 67 anyos nga si “Mayok” sa Barangay Buntatala, Jaro niadtong Nobyembre 3. Gipasakahan siya og patung-patong nga mga kasong kriminal ug gipasanginlang taas nga upisyal sa rebolusyonaryong kalihukan. Adunay patong sa iyang ulo nga ₱2.55 milyon.

Gidakop sa mga pulis ug militar ang organisador sa mga mag-uuma ug katutubo nga si Marlene Espiritu samtang nagbyahe sa Mabalacat City, Pampanga niadtong Nobyembre 1. Gipasanginlan siyang taas nga upisyal sa BHB sa Central Luzon ug gisang-atan og lima ka kasong kriminal.

Sa Davao City, gipahamtangan og 30 ka adlaw nga suspensyon sa Ombudsman niadtong Oktubre 20 ang kapitan sa Barangay Bucana 76-A nga si Robert Olanolan tungod sa iyang pagsupak sa demolisyon sa Kabacan ug Times Beach sukad pa Enero 2024. Nag-atubang si Olanolan og reklamong grave abuse nga gisang-at sa DMCI nga nagplanong magtukod og negosyo sa maong lugar.