Sang nagligad nga semana, sunod-sunod ang mga report sang makaluluoy nga kahimtangan sang mga Pilipino nga migrante nga mapintas nga ginalagas, gina-abuso, gina-deport kag ginadingutan sang hustisya kag mga kinamatarung. Sa pagsingki sang pangkalibutanon nga krisis sa ekonomiya, ginapasibangdan sila sang reklamo nga pagpang-agaw sang trabaho, ginabasol sa implasyon kag pagsaka sang tantos sang krimen sa ginahamtangan nila nga mga pungsod.

Sa Canada, Japan kag Korea, mas nagsingki ang paglagas sa mga imigrante tungod sa kontra-migrante nga polisiya kag nagalala nga kultura sang rasismo kag xenophobia.

Sa Taiwan, naglab-ot sa 169 ang nalista nga isip sang biktima sang pagpanglugos sa kubay sang mga migrante nga mamumugon sa pungsod sadtong nagligad nga tuig. 22 sa mga biktima Pilipino. Mayoriya sa mga biktima nagatrabaho sa pabrika kag bilang mga domestic helper.

Sa US, 143 ka Pilipino nga marino ang gin-deport halin nagligad nga tuig. Sadtong Septyembre, ginkanselar sang embahada sang US sa Pilipinas ang aprobado nga mga US visa sang mga marino nga manughalin pa lang sa pungsod. Kaangay sa mga ginpang-deport nga mga marino, gingamit sang embahada nga rason ang pasibangud nga kaso nga child pornography bisan wala sang ebidensya ukon imbestigasyon nga ginhimo.

Sa Thailand, masobra sa isa ka gatos ka Pilipino nga biktima sang “scam-hub trafficking” ang nakaabot na sa dulunan sang Myanmar kag nagakinahanglan sang gilayon nga pagbulig kag gilayon nga aksyon.

Sa Kuwait, hilaw nga hustisya ang naagum sang pamilya ni Dafnie Nacalaban, isa ka domestic helper nga ginpatay sang iya amo. Gindagdagan lang sang 14 ka tuig nga pagkabilanggo ang iya amo nga manubo nga sentensya para sa iya krimen.

Sa The Netherlands, gindingot man ang hustisya sa 11 ka Pilipino nga migrante nga mamumugon sa desisyon sang Public Prosecution Service nga ibasura ang reklamo nila nga human trafficking batuk sa Saints and Stars Gym nga nakabase sa Amsterdam.

Ang makangilidlis nga kahimtangan sang mga migrante direkta nga bunga sang labor export policy sang reakyonaryong gobyernong Pilipino. Ginasuportahan sang mga patakaran nga ini ang migrasyon sang mga mamumugon nga Pilipino imbes nga sabton ang problema sa kawad-on sang trabaho, makabuhi nga sweldo kag desente nga sosyal nga serbisyo.