Ha naglabay nga mga semana, susrunod an mga report han grabe kamakuri nga kamutangan han mga Pilipino nga migrante nga madarahug nga ginlalanat, gin-aabuso, gindedeport ngan ginhihikawan han hustisya ngan mga katungod. Ha paggrabe han pankalibutan nga krisis ha ekonomiya, nagigin target hira han reklamo nga pangagaw han trabaho, ginbabasol ha implasyon ngan paghitaas han tantos han krimen ha ginkakamutangan nira nga mga nasud.

Ha Canada, Japan ngan Korea, mas naggrabe an paglanat ha mga imigrante durot han kontra-migrante nga patakaran ngan natikagrabe nga kultura han rasismo ngan xenophobia (pagdiri ha mga langyaw).

Ha Taiwan, inabot ha 169 an nahilista nga ihap han biktima han panlugos ha ranggo han mga migrante nga trabahador ha nasud hadton nakalabay nga tuig. Aada ha 22 ha mga biktima Pilipino. Mayoriya ha mga biktima nagtatrabaho ha pabrika ngan komo domestic helper.

Ha US, 143 nga Pilipino nga marino an igindeport tikang ha nakalabay nga tuig. Hadton Septyembre, ginkansela han embahada han US ha Pilipinas an aprubado na nga mga US visa han mga marino nga tigikan pala ha nasud. Sugad ha mga ginpadeport nga marino, gin-gamit han embahada nga hinungdan an akusasyon nga kaso nga child pornography bisan kun waray ebidensya o imbestigasyo nga iginhimo.

Ha Thailand, masobra usa kagatos nga Pilipino nga biktima han “scam-hub trafficking” an nakaabot na ha bawnderi han Myanmar ngan nanginginahanglan hin layon nga bulig ngan dagmit nga aksyon.

Ha Kuwait, hilaw nga hustisya an nakab-ot han pamilya ni Dafnie Nacalaban, usa nga domestic helper nga ginpatay han iya amo. Ginpatukan la hin 14 katuig nga pagkakapriso an nasering nga amo nga himubo nga sentensya para ha iya krimen.

Ha The Netherlands, iginhikaw liwat an hustisya ha 11 nga Pilipino nga migrante nga trabahador ha desisyon han Public Prosecution Service nga igbasura an reklamo nira nga human trafficking kontra ha Saints and Stars Gym nga nakabase ha Amsterdam.

An makaluluoy nga kamutangan han mga migrante direkta nga bunga han labor export policy han reakyunaryo nga gubyerno nga Pilipino. Gin-uundong hini nga mga palisiya an migrasyon han mga trabahador nga Pilipino imbes nga batunon an problema han kawaray trabaho, makaburuhi nga suhol ngan disente nga serbisyo sosyal.