Isa ka bulan na nga ginagamo sang 12th Civil Military Operation (CMO) Battalion kag NTF-Elcac ang mga residente sang North Caloocan. Wala-tuo ang ginhimo sini nga Red-tagging, pagpangtiktik kag pagpang-ipit ilabi na sa mga myembro sang progresibong organisasyon sa mga barangay.

Una nga nadeploy ang batalyon sa Barangay 181-182, Pangarap Village sadtong Oktobre 3 sa tabon sang Community Support Program. Plano sang militar nga sumpuon ang pakigbato sang pumuluyo nga nagaatubang sa peligro sang demolisyon halin sa pamilya Araneta.

Nagsugod nga magkampo ang 12th CMO sa pagpanguna ni 2nd Lt. Julie San Jose sa likod sang covered court sang Barangay 175, Camarin sadtong Oktobre 6, sa tabon sang kalinong kag katawhayan. Diri na nagpokus sang operasyon ang batalyon. Pagkaligad sang pila ka adlaw ginsakop sang ila operasyon ang Barangay 187-188 Tala.

Sadtong Oktobre 28, ginsulod ang opisina sang Gabriela-Caloocan sang nagpakilala nga mga pulis. Nagdeklarar ang mga ini nga may dala nga warrant of arrest pero wala sang may ginpakita nga dokumento. Sa amo man nga adlaw, ginpatawag sang militar kag kapitan sang barangay ang mga myembro sang Gabriela-Matarik sa barangay hall kon diin ginpasibangdan sila nga rekruter sang rebolusyonaryong organisasyon.

Gingamit man sang NTF-Elcac ang asembliya sang barangay sadtong Oktobre 18 agud magpalapnag sang sayup nga impormasyon kag i-Red-tag ang mga organisasyon masa. Hayagan ang pagpaniktik sang militar sa mga aksyon protesta batuk sa korapsyon sang mga progresibo nga grupo, nga ginlunsar sa Camarin Kiko Palengke kag sa UCC Congressional Village sadtong Oktobre 10 kag 17.

Nagakahangawa ang Defend Caloocan nga liwat piliton sang militar ang mga myembro sang progresibo nga grupo kag mga residente nga “magbalik sa gobyerno” kaangay sa ginhimo sang 12th CMO sa United Vendors Alliance sadtong 2024.

Ang militarisasyon nga nagakahitabo sa North Caloocan santo sa balayon sang National Action Plan for Unity, Peace and Development. Suno sa programa nga Capacitating Urban Communities for Peace and Development nga ginpangunahan sang Department of the Interior and Local Government, ginpaidalum ang mga komunidad sa kasyudaran nga may nagatindog nga pungsodnon nga organisasyon sa operasyon sarbeylans, pagpang-ipit kag pagpangsumpo sang PNP kag AFP.