Usa kabulan na nga ginsasamok han 12th Civil Military Operation (CMO) Battalion ngan NTF-Elcac an mga residente han North Caloocan. Wala-tuo an iginhimo hini nga Red-tagging, paniniktik ngan pan-gigipit labina ha mga membro han progresibo nga organisasyon ha mga barangay.

Syahan nga nadeploy an batalyon ha Barangay 181-182, Pangarap Village hadton Oktubre 3 ha tahub han Community Support Program. Plano han militar nga puypuyon an pag-ato han katawhan nga naatubang ha hulga han demolisyon tikang ha pamilya Araneta.

Nagtikang nga magkampo an 12th CMO ha pangunguna ni 2nd Lt. Julie San Jose ha likod han covered court han Barangay 175, Camarin hadton Oktubre 6, ha tahub han kamurayawan ngan kaayusan. Dinhi na nagpokus han operasyon an batalyon. Kataliwan han pira kaadlaw ginlupgop han ira operasyon an Barangay 187-188 Tala.

Hadton Oktubre 28, ginsulod an upisina han Gabriela-Caloocan han nagpakilala nga mga pulis. Nagdeklara ini nga may dara nga mandamyento de aresto kundi waray nahipakita nga dokumento. Ha pareho nga adlaw, iginpatawag han militar ngan kapitan han barangay an mga membro han Gabriela-Matarik ha barangay hall diin gin-akusahan hira nga rekruter han rebolusyunaryo nga organisasyon.

Gin-gamit liwat han NTF-Elcac an asembleya han barangay hadton Oktubre 18 agud magpasamwak han sayop nga impormasyon ngan ig-Red-tag an mga organisasyon masa. Butaray an paniniktik han militar ha mga gios protesta kontra ha korapsyon han mga progresibo nga grupo, nga iginlansar ha Camarin Kiko Palengke ngan ha UCC Congressional Village hadton Oktubre 10 ngan 17.

Nababaraka an Defend Caloocan nga utro nga pupuguson han militar an mga membro han progresibo nga grupo ngan an mga residente nga “magbalik-loob” sugad han ginhimo han 12th CMO ha United Vendors Alliance hadton 2024.

An militarisasyon nga nahitatabo ha North Caloocan nakasubay ha balayan han National Action Plan for Unity, Peace and Development. Sigon ha programa nga Capacitating Urban Communities for Peace and Development nga ginpapangunahan han Department of the Interior and Local Government, iginpapailarum an mga komunidad ha kasyudaran nga mayda nakatukod nga patriyotiko nga organisasyon ha operasyon nga sarbeylans, pan-gigipit ngan panmuypoy han PNP ngan AFP.