Pukaw ngan militante nga ginpapakyas han mga kabatan-unan ngan estudyante an gin-atentar nga panginginlabot han National Task Force-Elcac ngan mga binaydan nga traydor ha rebolusyunaryo nga kagiusan ha mga unibersidad ha tahub han mga “porum” ngan “akademiko nga diskusyon.”

Ha UP Mindanao, nag-walkout an mga lider-estudyante ha kampus ha porum han TAGBO 2025 hadton Oktubre 26 tungod ha paglusot ngan pagyayakan ni Arian Ramos, traydor ha rebolusyunaryo nga kagiusan ngan usa ha pinakatampalasan nga tagdepensa han NTF-Elcac ngan Armed Forces of the Philippines. Hi Ramos, sugad han iya igkasi traydor, an nangunguna ha Red-tagging han lehitimo nga mga organisasyon han estudyante ngan ira mga lider. Nagdara pa hi Ramos hin “bodyguard” nga ahente paniktik nga nagdurot hin grabe nga kabaraka ha mga estudyante.

Gindayaw han Council of Student Leaders han unibersidad an ginhimo nga pag-walkout han mga estudyante. Ginsukna liwat nira an administrasyon han UP Mindanao nga nagtugot ha panhitabo nga sering nira diri usa nga “isolated” (nalalain) nga insidente. Sering nira, espiho ini han mga “kaluyahan ha institusyon” nga hadto na nira ginsukna. Masobra 30 nga organisasyon nga pan-estudyante han UP Mindanao an nagpirma ha pahayag han CSL.

Ha UST, napaatras han kolektibo nga pagkundena han mga estudyante an partisipasyon kunta han NTF-Elcac ha porum nga “Preventing Terror Grooming: The Philippine Experience.” Sigon ha mga progresibo nga grupo ha kampus, an pag-imbita ha ahensya pagtamas-tamas ha dungog han unibersidad ngan ha mga Tomasino nga iginpapakigbisog an kamatuoran.

Hadton Nobyembre 5, naghimo hin protesta an mga estudyante ha kampus komo pagrehistro han pagsukna ha NTF-Elcac ngan ha porum. Bisan kun napaatras an NTF-Elcac, nagserbe pa gihapon nga bisita ngan tagapagyakan ha porum hadton Nobyembre 6 an tinaglawas han National Security Council ngan traydor nga hi Arian Ramos. Nakigdebate ha ira ngan nanindugan kontra Red-tagging an usa nga aktibista ha UST.